Дар бинои “Бухоро Палас” дар шаҳри Душанбе 8 июн маросими ифтитоҳи дафтари кории TajRupt – нахустин маркази омӯзиши зеҳни сунъӣ дар Осиёи Марказӣ доир гардид.
Дар ин маросими тантанавӣ вазири саноат ва технолгияҳои нави ҷумҳурӣ Шералӣ Кабир, раиси Бонки миллии Тоҷикистон Ҳоким Холиқзода, ёвари президент дар умури масоили иқтисодӣ Неъматулло Ҳикматуллозода, вакилони парлумон, соҳибкорон ва бонкдорон ҳузур доштанд.
Дар оғози чорабинӣ муассиси маркази TajRupt Азизҷон Азимӣ меҳмононро бо фаъолияти марказ шинос кард.
Вазири саноат ва технологияҳои нав Шералӣ Кабир дар як машғулият тавонист шахсан иштирок кунаду тариқи тамоси онлайн бо толибилмон аз дигар шаҳрҳо гуфтугӯ кунад.
Сипас хатмкардагони муваффақи маркази TajRupt лоиҳаҳои худро ба ҳозирин муаррифӣ карданд.
Ба меҳмонон дар бораи барномаи муосири TajRupt оид ба ҷалби ҳуши маснуӣ ба бахши бонкӣ, ки дар ҳамдастӣ бо “Спитамен Бонк” амалӣ мешавад, муфассал маълумот доданд.
Зикр шуд, ки ҳуши маснуӣ метавонад мустақилона тавонманди бозгардони қарзи қарзгирандаро мавриди таҳлил қарор диҳад.
Шералӣ Кабир изҳор дошт, ки ба ҷавонон кумак, хусусан дар бахши ҳуши маснуӣ, зарур аст.
“Кӯшиш мекунем, ки барои рушди соҳаатон каме ҳам бошад, кумак кунем. Дар Вазорат бобати кадом соҳаҳоро дар навбати аввал дастгирӣ кардан бисёр баҳс кардем, то ки ба иҷрои вазифаҳои назди ҳукумат гузошташуда ноил гардем. Барои муваффақ шудан ҳама чиз дорем ва аввалини академияи ҳуши маснуӣ инро тасдиқ мекунад”, – гуфт вазири саноат ва технологияҳои нав.
TajRupt ташкилоти ғайриҳукуматӣ буда, тавсеъаи имконоти ҷавонони кишвар тариқи ба онҳо пешниҳод намудани донишу технологияҳои нодиру муосир дар соҳаи ҳуши маснуӣ аз ҷумлаи ҳадафҳояш ба шумор меравад.
TajRupt.AI бошад, аввалин озмоишгоҳи таҳқиқотӣ оид ба омӯзиши ҳуши маснуӣ дар Осиёи Марказӣ буда, моҳи ноябри соли 2019 боз шуд.
Ҳадафи он – таъсиси маркази минтақавии таҳқиқотӣ ва соҳибкорӣ дар соҳаи зеҳни сунъӣ унвон мешавад.
Муассис ва раиси он Азизҷон Азимӣ, тоҷики 23-сола, магистранти мактаби олии тиҷорати Стэнфорд ва мактаби Кеннедии Ҳарвард аст.
Соли 2018 ин ҷавон ба рӯйхати “30 то 30 сол”-и Форбс шомил гардид.
Қаблан яке аз ширкатҳои пешсафи технологии ҷаҳон Microsoft ташкилоти ғайритиҷоратии TajRupt.AI-и Тоҷикистонро ба сифати яке аз ғолибони барномаи глобалии таҳқиқотии худ – “AI for Health” барои роҳандозӣ кардани ҳуши маснуӣ дар бахши тандурустӣ интихоб карда буд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
