Хонаводаи Меҳроншоҳ Аҳлиддинзода (Ҷумъаев) – афсари шуъбаи корҳои дохилии ноҳияи Панҷи вилояти Хатлон, ки дар бинои ин ниҳод аз сӯйи ҳамкораш Насим Амирзода паронда шуд, аз ҳукми додгоҳи ноҳияи Панҷ ба Додгоҳи Олии Тоҷикистон шикоят бурданд. Дар ин бора амаки афсари кушташуда Холиқназар Ҷумъаев ба “Азия плюс” хабар дод.
Наздикони афсари кушташуда дар шикоят ба Додгоҳи олӣ арз кардаанд, ки “суди зинаи аввал бар хилофи талаботи қонунҳои ҷории амалкунанда амал намуда, парвандаро яктарафа, ғайримунсифона, бе таҳқиқи ҳамаҷониба ва пурраи далелҳо, нишондодҳои нопурраи шоҳидон, бе муқаррар намудани ҳолати воқеии ҷинояти содиршуда ва истифодаи дурусти қонунҳо ҳангоми ҳалли парвандаи мазкур баррасӣ намуда, бо такя намудан ба далелҳои беэътимод ва нодуруст ҳукми беасос баровардааст”.
Наздикони марҳум даъво доранд, ки Коллегияи судӣ оид ба парвандаҳои ҷиноятии суди вилояти Хатлон ва марҳилаи назоратии суди вилояти Халтон низ ин хатоҳоро дар таъинот ва қарори ба тасвибрасонидаашон такрор намудаанд.
Наздикони Меҳроншоҳ даъво доранд, ки суд далелҳои аз ҷониби онҳо – намояндагони ҷабрида пешниҳодшударо ба инобат нагирифта, дархостҳои хаттӣ дар мавриди такроран гузаронидани экспертиза вобаста ба коршоямӣ ва ё корношоям будани камераи мушоҳидавии дохили бино, гузаронидани ташхиси хатшиносӣ ва даъват кардани баъзе шоҳидонро ба суд сарфи назар намудааст.
Наздикони афсари кушташуда аз қарори додгоҳи ноҳияи Панҷ изҳори норозигӣ намуда, аз Додгоҳи Олӣ хоҳиш крадаанд, ки “ҳукми суди ноҳияи Панҷи вилояти Хатлон аз санаи 11.05.2021сол. нисбати судшаванда Амирзода Насим Абдукарим бо моддаи 108, қисми 2 КҶҶумҳурии Тоҷикистон бинобар беасос ва ғайриқонунӣ буданаш бекор карда шуда, барои баррасии нав ба ҳамин суд дар ҳайати дигар судя ирсол карда шавад”.
Ёдовар мешавем, ки афсари милиса, лейтенанти калон Меҳроншоҳ Ҷумъаев (Аҳлиддинзода), ки ба ҳайси нозири минтақавӣ дар ҷамоати деҳоти Кабут Сайфиддинови ноҳияи Панҷ хидмат мекард, соати 4-и субҳи 7 феврал аз тири старшинаи милитсия Амирзода Насим Абдукарим ҳангоми иҷрои вазифаи хизматӣ, дар ҷойи кор, яъне дар дохили бинои ШВКД Панҷ кушта шуд. Старшинаи милитсия Амирзода Насим Абдукарим ба сӯи марҳӯм ду тир парронд, ки яке ба Меҳроншоҳ бархӯрда, ӯро дар ҷойи ҳодиса кушт ва тири дигар хато рафта, ба шифт бархӯрда буд.
Прокуратураи ноҳияи Панҷ нисбати Амирзода Насим Абдукарим, старшинаи милитсия бо моддаи 108 қисми 2 (куштор аз беэҳтиётӣ) парванда боз карда буд, ки бо ҳукми Додгоҳи ноҳияи Панҷ рӯзи 11-уми май Насим Амирзода Насим ҳамагӣ 3 сол ҳукми маҳбас дар низоми сукунатӣ муҷозот шуд, ки ин ба гуфтаи наздикони Меҳроншоҳ ноодилона буда, боиси муроҷиати онҳо ба зинаҳои болоии додгоҳӣ шуд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
