Пойгоҳи тадқиқотии «Диссернет» устоди кафедраи умумидонишгоҳии назарияи иқтисоди Донишгоҳи миллии Тоҷикистон ва корманди феълии Бонки миллии кишвар, Аббос Норовро ба асардӯздӣ, дар вақти навиштани рисолаи илмияш маттаҳам кардааст.
Ҳамчунин яке аз Пажуҳишгоҳҳои Академияи илмҳои Русия тавсия додааст, ки Норов аз унвони “номзади илми иқтисод” маҳрум карда шавад. Ин маълумотро пойгоҳи мазкур, имрӯз, 24 августи соли равон нашр кардааст
Ба навиштаи торномаи ин пойгоҳ, Норов Аббос рисолаи номзадии худро дар мавзӯи “Асосҳои иҷтимоӣ-иқтисодӣ коҳиши сатҳи фақр” (дар асосои маводи Ҷумҳурии Тоҷикистон ) (Социально – экономические основы сокращения уровня бедности) бахши зиёди кори худро аз рисолаи илмии Ирина Коновалова “Преодоление бедности: социально-экономическое содержание, фактори и пути сокращения”, ки соли 2005 дифоъ шудааст, Нуралиев Амрулло “Пути повышения уровня жизни сельского населения: на материалах Республики Таджкистан”, ки соли 2010 дифоъ шудааст ва Елисеева И.И. “Социальная статистика” (2001) рӯйбардор карда, даст ба асардӯздӣ задааст.
Манбаъ менависад, ки дар матни рисола истинод ба кори илмии Нуралиев А. мавҷуд аст, вале ҷобаҷогузории онҳо ба ҳаҷми иқтибосҳо мувофиқат намекунад.
– Аз саҳифаи 22 то 70 матн бо асарҳои дигар олимон пурра мувофиқат мекунад ва танҳо дар баъзе ҷойҳо калимаи “Русия” ба “кишвари мо” ва ё “Тоҷикистон” иваз шудаасту халос,- менависад ин пойгоҳ.
“Диссернет” навиштааст, ки Норов дар 21 саҳифаи рисолаи илмияш аз кори Ирина Коновалова, дар 5 саҳифааш аз кори Елисеева И.И., дар 10 саҳифааш аз “Ҳисоботи таҳлилии “Сиёсати меҳнат дар Тоҷикистон (Душанбе: Ирфон, 2010) ва дар 25 саҳифааш аз кори Нуралиев Амрулло саҳифаҳоеро пурра ва саҳифаеро қисман рӯйбардор кардааст.
Пойгоҳ менависад, ки Норов 26-уми майи соли 2012 рисолаи номзадии худро дар шӯрои дифоъи рисолаҳои назди Донишгоҳи муштараки славянии Тоҷикистону Русия зери роҳбарии Диловар Қодиров – муовини феълии вазири маориф ва илми Тоҷикистон дифоъ кардааст.
Ба навиштаи “Диссернет”, Шӯрои ҳимояи рисолаҳои Д 002.061.01 назди Пажуҳишгоҳи пешгӯиҳои хоҷагии қишлоқи Академияи илмҳои Русия тавсия додааст, ки Аббос Норов аз унвони номзади илми иқтисод маҳрум карда шавад.
То кунун мавқеи Норов дар мавриди ин таҳқиқи “Диссернет” маълум нест.
Пойгоҳи “Диссернет”як пойгоҳи мустақили таҳқиқотии интернетиест, ки мавридҳои асардуздӣ дар рисолаҳоеро, ки дар КОА-и Русия дифоъ шудаанд, месанҷад.
Ин пойгоҳ дар 3-4 соли охир бештар аз 60 олими тоҷикро дар асардӯздӣ мутаҳҳам кард, аммо дар ин миён танҳо Абдурасул Сангинов, мудири кафедраи Донишгоҳи давлатии тиббии Тоҷикистон ба номи Абӯалӣ ибни Сино кори ин пойгоҳро ноодилона ва нодуруст хонду ба он вокуниши расмӣ кард.
Аммо баъдан пойгоҳи "Диссернет" хабар дод, ки раёсати КОА (ВАК)-и Русия тавсия додааст, ки унвони доктории Сангинов бекор карда шавад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
