Сокинони минтақаҳои Тоҷикистон шикоят мекунанд, ки аз онҳо аризаашонро дар бораи хидмат дар ҳайати захираҳои даъватӣ бо пардохти маблағ қабул намекунанд. Аз Вазорати мудофиа пурсидем, ки кай метавон дар ин хусус ариза пешниҳод намуд.
Падари яке аз даъватшавандагон аз вилояти Суғд ба “Азия-Плюс” дар ин робита хабар дод, ки аз ӯ дар бораи хидмат дар ҳайати захираҳои сафарбарӣ аризаашро қабул накардаанд.
“Ба комиссариати ҳарбӣ аризадиҳӣ рафтам, то ки писарам зудтар хидматро гузашта тибқи қонуни нав аз хидмати ҳатмӣ озод шавад. Лекин аризаамро қабул накарданд ва гуфтанд, ки аввал нақшаи даъватшавандагон ба хидмати ҳатмиро иҷро карда, сипас ба қабули аризаҳо оғоз мекунанд”, – изҳор дошт вай.
Хидмати ҳарбӣ дар захираи даъватӣ чист?
Ёдрас мекунем, ки мувофиқи тағйирот ба қонун “Дар бораи уҳдадории ҳарбӣ ва хидмати ҳарбӣ”, акнун хоҳишмандон метавонанд муҳлати ду соли маъмулӣ дар артиш хидмат накарда, ба ҷойи он 1 моҳ аз ҷамъомади ҳарбӣ гузаранд ва ба давлат маблағи муайян пардохт намоянд.
Ин хидмат дар ҳайати захираҳои сафарбарии даъватӣ ном дорад. Пас аз гузаштани он шаҳрванд аз адои хидмати ҳатмии ҳарбӣ озод карда мешавад.
Ин хидматро ҳама гуна даъватшаванда гузашта метавонад, муҳимаш 25 ҳазору 200 сомонӣ (420 нишондиҳанда барои ҳисоб) пардохт кардан зарур аст.
Бо пул аллакай имкон дорад
Дар Вазорати мудофиаи Тоҷикистон итминон медиҳанд, ки аризаҳо аллакай қабул шуда истодаанд, лекин тибқи квота.
“Аз оғози даъват – 1 октябр аллакай барои хидмат дар ҳайати захираҳои сафарбарии даъватӣ метавон ариза дод. Комиссариатҳои ҳарбии шаҳру навоҳӣ аллакай аризаҳоро қабул мекунанд”, – хабар дод ба “Азия-Плюс” сардори маркази матбуоти Вазорати мудофиаи Фаридун Маҳмадализода.
Ба гуфтаи ӯ, ягона маҳдудият дар он буда метавонад, ки аризаҳо мувофиқи квотаи ҷудошуда қабул мешаванд.
“Тавре пештар хабар дода будем, ҳамасола мувофиқи шумори ҷойҳо дар пойгоҳҳо (базаҳо)-и ҷамъомади моҳона шумори муайяни квотаҳо ҷудо мешаванд. Шумори квотаҳо ифшо намегардад, чунки шумори артиш ва хизматчиёни ҳарбии он маълумоти махфист. Лекин агар квотаҳо дар даъвати ҷорӣ ба охир расида бошанд, метавон ба даъвати ояндаи моҳи май ариза дод”, – гуфт ӯ.
Зикр шуд, ки солҳои наздик баргузории ҷамъомадҳо дар давоми тамоми сол ба нақша гирифта шуда, он вақт ба ҷудокунии квотаҳо дигар зарурат намемонад.
“Вазорат аллакай ба сохтмони марказҳои ҷудогонаи таълимӣ ва пойгоҳҳо оғоз намуд, ки дар онҳо ҷамъомадҳои моҳона барои хидматчиёни захираҳои сафарбарии даъватӣ баргузор мешаванд. Вақте ки ба миқдори кофӣ марказҳо сохта шуданд, мо муддати тамоми сол ҷамъомадҳо гузаронида метавонем ва ду маротиба дар як сол мавсими даъватро интизор намешавем”, – зикр кард сардори маркази матбуоти Вазорат.
Ба савол дар бораи нигаронии бархе аз волидон дар мавриди ба ҷойи хидмат дар ҳайати сафарбарии даъватӣ ба хидмати ҳатмӣ ҷалб шудани фарзандони онҳо Маҳмадализода чунин посухи норушан дод: “Агар шахс ихтиёрӣ ба ҳайати захираҳои сафарбарии даъватӣ ба хизмат равад, ҳеҷ кас ӯро ба хидмати ҳатмии ҳарбӣ намефиристад. Лекин комиссариатҳои ҳарбӣ бояд нақшаи хидматчиёни ҳатмииро низ бояд иҷро кунанд”.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
