Ваколатдор оид ба ҳуқуқи инсон (Омбудсмен)-и Тоҷикистон Умед Бобозода 13 октябр ҷиҳати шиносоӣ бо вазъи риояи ҳуқуқи инсон аз Муассисаи ислоҳии ЯС 3/1-и Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон боздид кард.
Дар ин муассисаи ислоҳӣ аъзои Ҳизби фаъолияташ дар ҷумҳурӣ манъшудаи наҳзати исломӣ (ҲНИ), аз ҷумла Раҳматуллои Раҷаб, Ҳикматулло Сайфуллозода ва Абдуқаҳҳор Давлатов адои ҷазо мекунанд.
Бино ба иттилои дафтари матбуоти ин ниҳод, Умед Бобозода бо тартиб ва қоидаҳои нигоҳдошти маҳкумшудагон, шароити моддӣ ( хӯрок, либос, ҷои хоб), шароити санитарӣ, хизматрасонии тиббии муассиса шинос шуд.
Зимни суҳбат бо Ваколатдор Раҳматуллои Раҷаб ва Абдуқаҳҳор Давлатов изҳор намуданд, ки онҳо мавриди муносибати бераҳмона қарор дода нашудаанд.
Маҳкумшуда Ҳикматулло Сайфуллозода гуфтааст, ӯ аз ҷониби кормандон мавриди лату кӯб қарор нагирифта, балки байни ӯ ва дигар маҳкумшуда муноқиша сар задааст ва ин қазия хусусияти сиёсӣ надорад.
Дар ҳамин ҳол, ҳамсуҳбатони Омбудсмен зикр кардаанд, ки нисбати ҳукми судӣ норозианд ва барои аз нав баррасӣ кардани он ба мақомотҳои дахлдори давлатӣ муроҷиат намудаанд.
Ёдрас мекунем, ки наздикони панҷ нафар аз роҳбарони Ҳизби дар Тоҷикистон мамнуи наҳзати исломӣ бо ирсоли як нома аз созмонҳои ҷаҳонӣ хостанд, то ба вазъи хешовандони онҳо дар зиндон расидагӣ шавад.
Пайвандони Саидумар Ҳусайнӣ, Маҳмадалӣ Ҳайит, Раҳматуллои Раҷаб, Зубайдуллои Розиқ ва Ҳикматуллоҳ Сайфуллозода дар номаи худ навишта буданд, “ҷони онҳо дар хатар аст”.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
