Вазорати амри бар маъруф ва наҳӣ аз мункари ҳукумати Толибон дар Афғонистон ба дӯкондорони бозору марказҳои саводо дастур додаанд, ки "манекен" ё худ арӯсакҳоро аз назди дӯконҳояшон ё дур кунанд ё онҳоро сар бизананд.
Дар пайи ин дастури толибон дар шабакаҳои иҷтимоӣ навори видеоии кӯтоҳе нашр шудааст, ки як тоҷир дар дӯконаш сари "манекен"-ҳоро мебурад. Нашрияи "8 субҳ" бо нашри ин видеои кӯтоҳ гуфтааст, ки макони ин видео маълум нест.
Аммо нашрия навиштааст, ки "чанд рӯз пеш Вазорати амри бар маъруф ва наҳӣ аз мункари ҳукумати Толибон ба дӯкондорон дар чандин вилоят дастур дод, ки манекенҳоро бояд аз пеши ветрини дӯконҳояшон дур кунунд ё сар бибуранд".
Баъзе аз фаъолони шабакаҳои иҷтимоӣ навиштаанд, ки ин видео дар вилояти Ҳирот рӯйи навор омадааст.
Ҳукумати Толибон баъди ба қудрат расидан дар Кобул қавонини сахтгиронаеро ҷорӣ кардаанд, ки дар ҷомеаи Афғонистон "тафсири толибон аз ислом" унвон мешавад.
Аз ҷумла чанде пеш як фармон ё дастури хоси раиси ё амиралмуъминини ҳукумати толибон Мулло Ҳайбатуллоҳ Охунд содир шуд, ки ҳуқуқи занҳо дар Афғонистонро мушаххас мекард.
Дар ин фармон, ки бо хитоб ба ҳама масъулини аморати исломӣ, уламо ва бузургони қавмӣ дар Афғонистон содир шудааст, дастур дода мешавад, ки барои таъмини ҳуқуқи занон иқдомоти ҷиддӣ кунанд.
Бар асоси фармони раиси толибон, "ризояти духтарони болиғ дар аснои никоҳ зарурӣ аст". Раиси толибон гуфтааст, ки ҳеч касе бо ҷабр наметавонад занро барои никоҳ маҷбур кунад.
Дар банди дувуми ин фармон гуфта мешавад, ки "зан мол нест, балки инсони асил ва озод аст ва ҳеч касе онро дар бадали сулҳ дода наметавонад".
Банди сеи ин фармон дар мавриди ҳуқуқи зан пас аз мурдани шавҳараш аст, ки акнун тибқи ин фармони толибон, пас аз вафоти шавҳар ва гузаштани давраи шаръӣ (чаҳор моҳу 10 рӯз) зани бевамондаро на бародари шавҳараш ба никоҳ дароварда метавонад ва на каси дигаре. Толибон дар ин маврид, зани бевамондаро барои таъини сарнавишт ва никоҳи худ, соҳибихтиёр эълон кардаанд.
Пештар аз ин Вазорати ҳаҷҷу авқофи ҳукумати сарпарасти "Толибон" дастурҳое содир карда буд, ки занҳо дар Афғонистон чӣ гуна либос метавонанд бипӯшанд ва пӯшидани чӣ либосе манъ аст.
"Занони мусалмон набояд ба гунае либос бипӯшанд, ки барҷастагиҳои баданашон қобили ташхис бошад. Либоси зани мусалмон нозук ҳам набояд бошад, ки баданашон намоён шавад",-омада буд дар дастури ин вазорат.
Ин фармони толибон дар ҳолест, ки баъди ба қудрат расидани ин гурӯҳ дар Кобул, нигарониҳо ҳам дар сатҳи Афғонистон ва ҳам дар сатҳи ҷаҳон аз он аст, ки занҳо аз ҳаққи таҳсил маҳрум шудаанд ва толибон то кунун дидгоҳашонро дар бораи ҳақи таҳсили занон мушаххас накардаанд.
Сарфи назар аз қавонини сахтгиронаи толибон занҳо дар сар то сари Афғонистон борҳо даст ба эътироз задаанд ва аз толибон мехоҳанд, ки ҳуқуқҳои онҳоро барои таҳсил, кор ва дигар бахшҳо таъмин кунанд.
Ҳар он чи дар Афғонистон рух медиҳад, метавонед мустақиман дар сужаи мо – "Афғонистон" бихонед.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
