Ҳукумати Тоҷикистон бо қарорҳои худ аз 27 январ раҳбарияти Ширкати саҳҳомии холдингии кушодаи “Барқи тоҷик”-ро иваз кард.
Ба ин тариқ, Асозода Маҳмадумар Шамсулло раиси нави ширкати “Барқи тоҷик” таъин шуд. То ин таъинот ӯ ба ҳайси муовини аввали раиси ширкат Мирзо Исмоилзода кор мекард.
Ҳамчунин муовинони раиси “Барқи тоҷик” Мавҷуда Холиқзода бо сабаби ба нафақа баромадан ва Ғуломзода Муҳаммад Қурбон дар робита “ба кори дигар гузаштан” аз мансабҳояшон барканор шуданд.
Қурбонзода Абдулло Абдураҳим муовини раиси ширкат таъин шуда, курсии дуюми муовини раис ва вазифаи муовини аввали раис алҳол холианд.
Маҳмадумар Асозода кист?
Ӯ 1 ноябри соли 1968 дар шаҳри Норак таваллуд шуда, аз рӯи ихтисоси муҳандис-барқчӣ (электрик) маълумоти олӣ дорад. Соли 1992 Донишкадаи политехникии Тоҷикистонро хатм кардааст.
Солҳои 1992-1995 – муҳандиси ОРУ-220 кВ озмоишгоҳи электро-техникӣ, муҳандиси категорияи 2, муҳандиси категорияи 1-и НБО Норак;
Солҳои 1995-2006 – сардори Хадамоти истеҳсолӣ-техникӣ (ПТС)-и НБО Бойғозӣ;
Солҳои 2006-2015 – сармуҳандиси НБО Бойғозӣ;
Соли 2015 (04.11) – сардори Сарраёсати сиёсати энергетикӣ ва захираҳои обӣ, рушди илм ва техникаи Вазорати энергетика ва захираҳои оби ҶТ;
Аз ноябри соли 2015 – муовини аввал – директори иҷроияи яке аз департаментҳои ширкати “Барқи тоҷик”;
Аз 27 январи соли 2022 – раиси ширкати “Барқи тоҷик”.
Қобили зикр аст, ки раиси собиқи ширкати “Барқи тоҷик” Мирзо Исмоилзода низ аз рӯи ихтисоси муҳандис-барқчӣ маълумоти олӣ дошта, хатмкардаи Донишгоҳи политехникии Тоҷикистон аст.
Ба ҳайси нозири “Тоҷикэнергонадзор” дар гурӯҳи ноҳияи минтақаи Кӯлоб, сармуҳандиси “Энергсобит”-и минтақаи Қӯрғонтеппа кор кардааст.
Дар шабакаҳои барқи шаҳри Кӯлоб фаъолият намуда, соли 2008 онро ба роҳбарӣ гирифта буд. Соли 2014 раиси ҶСК “Шабакаҳои барқи ш.Душанбе” ва 26 августи соли 2015 раиси ШСХК “Барқи тоҷик” таъин шуд.
Акнун иҷрокунандаи вазифаи раиси шаҳри Ваҳдат таъин шуд.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
