Дар ҷаласаи Шӯрои Маҷлиси намояндагони Маҷлиси Олии Тоҷикистон рӯзи 28 март Протокол дар бораи ворид намудани иловаҳо ба Созишнома байни ҳукуматҳои Тоҷикистон ва Ӯзбекистон дар бораи мусофирати мутақобилаи шаҳрвандон аз 9 марти соли 2018 баррасӣ шуд. Ин тағйирот ба муҳлати будубоши тоҷикистониён дар қаламрави кишвари ҳамсоя бидуни сабти муваққатӣ дахл дорад, ки эҳтимол то 10 рӯз дароз карда мешавад.
“Шаҳрвандони давлати яке аз Тарафҳо, ки ба қаламрави давлати Тарафи дигар ворид мешаванд, аз уҳдадории бақайдгирӣ ва қайди муваққатӣ дар мақомоти салоҳиятдори давлати Тарафи иқомат ба муҳлати 10 (даҳ) рӯзи корӣ аз лаҳзаи гузаштани сарҳади давлатии давлати Тарафи қабулкунанда озод мешаванд”, – омадааст дар сомонаи палатаи поёнии парлумони Тоҷикистон.
Вакили Маҷлиси намояндагон Равшан Раҷабзода зимни шарҳи протокол иброз дошт, ки бо дарназардошти он, ки солҳои охир шумораи шаҳрвандони Тоҷикистон, ки ба Ӯзбекистон сафар менамоянд, афзоиш ёфтаанд ва бинобар сабаби кам будани муҳлати бақайдгирӣ баъзан ба мушкилиҳо рӯ ба рӯ мешаванд, аз ин лиҳоз Протокол дар бораи ворид намудани иловаҳо ба Созишнома байниҳукуматӣ дар бораи мусофирати мутақобилаи шаҳрвандон аз 9 марти соли 2018 ба имзо расонида шуд, ки тибқи он ба бандҳои 3 ва 4 илова ворид карда шуданд.
Қаблан шаҳрвандони Тоҷикистон бидуни бақайдгирӣ се шабонарӯз метавонистанд дар қаламрави Ӯзбекистон қарор дошта бошанд.
Ёдрас мекунем, ки мувофиқи Созишнома “Дар бораи мусофирати мутақобилаи шаҳрвандон”, шаҳрвандони Тоҷикистон ва Ӯзбекистон бидуни раводид (виза) метавонанд то 30 рӯз дар қаламрави кишвари ҳамсоя қарор дошта бошанд.
Тоҷикистон аз 15 март ва Ӯзбекистон аз 16 март гузаргоҳҳои заминиро байни кишварҳо пурра боз намуданд.
Тибқи қарори Комиссияи махсуси ҷумҳуриявии Ӯзбекистон оид ба мубориза бо коронавирус, аз 16 март бо доштани шиноснома/сертификатҳои ваксина гирифтан аз сирояти коронавирус, ба вуруди ҳамаи шахсон ба Ӯзбекистон бидуни ПСР-тест иҷоза дода мешавад.
Аммо дар сурати надоштани шиноснома/сертификатҳои ваксина гирифтан, шахси воридшаванда бояд натиҷаҳои манфии ПСР-тест (бо QR-коди электронӣ)-ро бо худ дошта бошад, ки на зиёдтар аз 72 соат то замони расидан дода шудааст ё зимни вуруд ба қаламрави Ӯзбекистон экспресс-тест месупорад.
Айни замон кори ҳамаи гузаргоҳҳои сарҳадӣ дар сарҳади муштарак барқарор карда шудааст.
Ҳамчунин бо қарори Ситоди ҷумҳуриявии муқовимат бо COVID-19-и Тоҷикистон, фаъолияти ҳамаи гузаргоҳҳои марзи давлатӣ бо Ӯзбекистон ба реҷаи муқаррарӣ гузаронида шуд.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
