Дар хадамоти Вазорати меҳнат, муҳоҷират ва шуғли аҳолии ҷумҳурӣ аз фаъолият дар семоҳаи якуми соли 2022 натиҷагирӣ шуд. Мувофиқи ҳисоботи хадамоти марбутаи Вазорат, дар муқоиса бо ҳамин давраи соли гузашта музди меҳнати миёна дар Тоҷикистон 12% зиёд шудааст.
Тибқи ҳисоботи Агенти меҳнат ва шуғл, то 1 феврали соли 2022 маоши миёнаи номиналӣ 1 ҳазору 619,1 сомониро ташкил додааст, ки 173,8 сомонӣ ё худ 12% зиёдтар нисбат ба ҳамин давраи соли гузашта аст.
Музди меҳнати ҳадди ақал (номиналӣ) 400 сомониро ташкил дода, тибқи маълумоти Вазорат, нимсолаи дуюм андозаи он то 600 сомонӣ боло бурда мешавад.
Бино ба маълумоти Агентӣ, аз рӯи натиҷаҳои соли 2022 дар Тоҷикистон 339 ҳазору 686 субъектҳои хоҷагидорӣ ба қайд гирифта шудааст. Ҳиссаи бештари онро хоҷагиҳои деҳқониву фермерӣ – 168 ҳазору 90 адад ташкил дода, шумори корхонаву муассиса ва ташкилот ба 31 ҳазору 356 адад баробар аст.
Ғайр аз ин, дар Тоҷикистон зиёда аз 140 ҳазор соҳибкорон фаъолият доранд, ки 103 ҳазору 581 нафарашон бар асоси патент ва 35 ҳазору 659 нафарашон тибқи шаҳодатнома кор мекунанд.
Ҳамчунин маълумоти омории Вазорати меҳнат аз рӯи нишондиҳандаҳои зерин нашр шудааст:
Аҳолии Тоҷикистон – 9 млн 838 ҳазору 400 нафар
Шуғли расмӣ – 2 млн 506 ҳазору 200 нафар
Аҳолии аз ҷиҳати иқтисодӣ фаъол – 2 млн 533 ҳазору 200 нафар
Аҳолии аз ҷиҳати иқтисодӣ нофаъол – 3 млн 193 ҳазор нафар
Муҳоҷирони корӣ – 387 ҳазор нафар
Шахсони бекор – 58 ҳазор нафар
Шуғли ғайрирасмӣ – 150 ҳазор нафар
Захираҳои меҳнатӣ – 5 млн 726 ҳазору 200 нафар
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
