Тоҷикистон талош дорад Бунёди байналмилалии ҳифзи пиряхҳо дар сатҳи ҷаҳон таъсис шавад ва Созмони Милали Муттаҳаид соли 2025-ро "Соли байналмилалии ҳифзи пиряхҳо" эълон кунад. Намояндаи Тоҷикистон дар СММ роҳи муассиртарин барои ин корро ворид кардани ин ташаббусҳо ба қатъномаи Маҷмаи Умумии СММ медонад.
Раиси Кумитаи ҳифзи муҳити зисти Тоҷикистон Баҳодур Шерализода дар ин маврид бо Намояндаи доимии Тоҷикистон дар СММ Ҷонибек Ҳикмат мулоқоти маҷозӣ доир кардааст.
Кумитаи ҳифзи муҳити зист мегӯяд, ки мавзуи асосии ин мулоқот роҳҳои татбиқи ташаббуси президенти Тоҷикистон Эмомалӣ Раҳмон дар мавриди эълон намудани соли 2025 ҳамчун соли байналмилалии ҳифзи пиряхҳо, буд.
Намояндаи Тоҷикистон дар СММ гуфтааст, ки Маҷмаи Умумии СММ бо ибтикори кишвари мо ҳашт қатънома қабул кард ва кишвари мо борҳо дар сатҳи баланд ҳамоишҳои байналмилалӣ доир намуда, масъалаҳои муҳимро баррасӣ кардааст.
Дар чанд соли ахир прияхҳои Тоҷикистон ҳудуди 30% масоҳати худро аз даст додаанд ва коршиносону мутахассисони соҳаи экология мегӯянд, ин раванд идома дорад.
Дар ҳоли ҳозир, аз 14 ҳазор пирях дар Тоҷикистон як ҳазори он комилан аз байн рафтаанд. Аз ҷумла мутахассисон мегӯянд, ки пиряхи Федченко, ки яке аз бузургтарин пиряхи ҷаҳон маҳсуб мешавад, беш аз як километр масоҳати худ ё 2 километри кубии яхро аз даст додааст.
