Филми мустанади Абдуллоҳ Ғурбатӣ, рӯзноманигори боздоштшудаи тоҷик таҳти унвони “Аз ҳад калон” («Слишком большой») ба ҷашнвораи филмҳои кӯтоҳи Байконур, ки дар Қазоқистон баргузор мешавад, роҳ ёфт. Дар ин бора масъулини ҷашвора хабар медиҳанд.
Гуфта мешавад, филми "Аз ҳад калон "-и Абдуллоҳ Ғурбатӣ ягона филм аз Тоҷикистон аст, ки дар баробари 17 филми намояндагони дигар кишварҳо дар ин ҷашнвора намоиш дода мешавад. Худи Абдуллоҳ Ғурбатӣ ҳоло дар боздошт қарор дорад.
Филми "Аз ҳад калон" аз сарнавишти кӯдаке бо номи Абдураҳмон қисса мекунад, ки ҳамагӣ 13 сол дошта, бо сабаби тангдастӣ аз дарсу илмомӯзи дур мондааст ва дар бозор аробакашӣ карда, бори зиндагӣ пеш мебарад. Ин наврас мехоҳад мисли дигар ҳамсолонаш дар мактаб таҳсил кунад, аммо фақр ва шароити пасти иҷтимоӣ дар оила ба ӯ ин имкониятро намедиҳад.
Ин филмро тақрибан чор моҳ пеш дар Ӯзбекистон низ, дар доираи як ҷашнвора намоиш дода буданд ва Абдуллоҳ Ғурбатӣ ҳамчун муаллиф ба таври онлайнӣ дар намоиш иштирок ва филмро муаррифӣ карда буд.
Абдуллоҳ Ғурбатӣ замоне боздошт гардид, ки дар робита ба парвандаи Далери Имомалӣ, блогери боздоштшудаи тоҷик ба прокуратураи ноҳияи Шоҳмансур даъват гардида буд. Дар оғоз мақомот ӯро барои итоат накардан ба корманди пулис боздошт карданд, вале баъдан Абдуллоҳ ба аъзогии ҳизби дар Тоҷикистон мамнуи наҳзати исломӣ гумонбар дониста шуд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
