Президенти Тоҷикистон Эмомалӣ Раҳмон бо Президенти Русия Владимир Путин суҳбати телефонӣ доир намуд. Дар ин бора сомонаи Президенти Ҷумҳурии Тоҷикистон иттилоъ медиҳад.
Зикр карда мешавад, ки “дар ҷараёни суҳбат сарони ду давлат дар идомаи муколамаи мунтазами худ ҷанбаҳои алоҳидаи мубрами муносибатҳои дуҷонибаи шарикии стратегиро мавриди муҳокима қарор доданд”.
“Вобаста ба вазъ дар ноҳияҳои наздисарҳадии Тоҷикистон ва Қирғизистон баамаломада масъалаҳои рушди вазъият дар Осиёи Марказӣ низ дар маркази диққати ҷонибҳо қарор дошт”, – гуфта мешавад дар хабари сомонаи президент.
Ҳамчунин, дигар ҷанбаҳои таъмини амнияти минтақавӣ, аз ҷумла қазияи Афғонистон, баррасӣ гардиданд.
Дар ҳамин ҳол, сомонаи расмии Президенти Русия хабар медиҳад, ки худи ҳамон рӯз Владимир Путин бо Президенти Қирғизистон Содир Ҷабборов низ суҳбати телефони намудааст.
Гуфта мешавад, ки дар ҷараёни суҳбат Содир Ҷабборов ба Владимир Путин оид ба низоъ дар марзи Қирғизистону Тоҷикистон ва вазъи марз ҳисобот додааст.
