Чанд лаҳза пеш, дар боздоштгоҳи муваққатии шаҳри Душанбе (СИЗО) мурофиаи додгоҳии журналисти тоҷик Абдуллоҳ Ғурбатӣ пушти дарҳои баста оғоз шуд.
Хабарнигори “Asia-Plus” аз назди боздоштгоҳ иттилоъ дод, ки ба мурофиа модари Абдуллоҳ, наздиконаш ва рӯзноманигоронро роҳ надоданд. Танҳо ба ҳамсараш иҷоза дода шуд, ки дар мурофиаи додгоҳӣ иштирок кунад.
Сабаби ба мурофиа роҳ надодани пайвандони Абдуллоҳ ва журналистон ва ҳамин тавр, пушти дарҳои баста баргузор намудани мурофиа то ҳол маълум нест ва касе шарҳ намедиҳад.
Ин лаҳзаҳо мурофиа бо раисии судяи Суди ноҳияи Шоҳмансур Беҳруз Шифо ҷараён дорад.
Абдуллоҳ Ғурбати яке аз чор журналистони боздоштшудаи тоҷик аст. Ӯ замоне боздошт гардид, ки дар робита ба парвандаи Далери Имомалӣ, блогери боздоштшудаи тоҷик ба прокуратураи ноҳияи Шоҳмансур даъват гардида буд.
Дар оғоз, мақомот ӯро барои “таҳқири намояндаи ҳокимият, истифодаи зӯроварӣ ба муқобили намояндаи ҳокимият” гумонбар медонистанд, вале баъдан Абдуллоҳ ба аъзогии ҳизби дар Тоҷикистон мамнуи наҳзати исломӣ гумонбар дониста шуд.
Наздикон ва худи Абдуллоҳ ҳамаи иттиҳомҳоро нисбати ӯ эълоншударо бо қатъият рад мекунанд.
Дертар тафсилоти бештар ироа хоҳад шуд.
