Меваҳое, ки Эмомалӣ Раҳмон, президенти Тоҷикистон, ба ҳамтои русаш Владимир Путин ба муносибати 70-солагии ӯ бурда буд, ба ятимхонаҳои шаҳри Санкт-Петербург тақсим карда шудааст. Барои расондани онхо шаш мошини боркаш киро кардаанд. Дар ин бора маъмурияти президенти Русия дар саҳифаи худ дар шабакаи ВКонтакте хабар додааст.
7 октябри соли 2022 дар Қасри Константиновский мулоқоти ғайрирасмии сарони кишварҳои ИДМ баргузор шуд. Ин рӯз ба солгарди Путин рост омад ва Эмомалӣ Раҳмон ба ӯ тӯҳфаи ғайриоддӣ – меваҳои тоҷикӣ тақдим кард.
"Шаш мошини боркаш бо нозу неъматҳои тоҷикӣ ба ятимхонаҳои Санкт-Петербург эҳдо шуд. Ин барои кӯдакон туҳфаи гуворо ва муфид буд", — омадааст дар хабар.
Раёсат ҳамчунин навори видеоии тарбиятгирандагони яке аз ятимхонаҳои Санкт-Петербургро нашр кардааст, ки барои тӯҳфаи болаззат ва муфид изҳори миннатдорӣ мекунанд.
Елена Крилова, котиби матбуотии Дастгоҳи раёсати ҷумҳурии Русия афзудааст, ки "бо супориши сарвари давлат меваҷот ба ятимхонаҳои Санкт-Петербург интиқол дода шуда, онҳоро шаш маркази таблиғи тарбияти оилавӣ қабул кардаанд".
Ёдовар мешавем, ки тӯҳфаи Эмомалӣ Раҳмон дар саҳни Қасри Константиновский дар шакли ду аҳроми тарбузу харбузаҳои тоҷикӣ ба маърази тамошо гузошта шуда, меваҳои боқимонда дар атрофи ин пирамидаҳо дар шакли қолин ва пайроҳаҳо ороста шуда буданд.
