Рӯзҳои 20-22 октябр дар шаҳри Марғелони Ӯзбекистон Ҷашнвораи 5-уми байнулмилалии нассоҷии анъанавии “Атлас байрами” (ҷвашнвораи атлас) доир гардид, хабар дода мешавад дар саҳифаи тамғаи Buta.tj дар Facebook. Дар ин чорабинӣ ҳайати беш аз 20 кишвар, аз ҷумла ҳунармандону косибони Тоҷикистон ширкат варзиданд.
Кишвари моро дар он 19 нафар, аз ҷумла адрасу атласбофон, читгарон, сӯзанидӯзон, намояндагони саноати пиллапарварӣ ва тарроҳони либоси атласу адрас намояндагӣ карданд. Устои читгари тоҷик Мирамин Саидов барои эҳёи анъанаҳои ҳунари читгарии тоҷик бо диплом ва ҷоиза сарфароз гардид.
Ҷашнвораи “Атлас байрами” аз ҷониби ҳокимияти вилояти Фарғона, шаҳрдории Марғелон, намояндагии ЮНЕСКО дар Тошканд, Вазорати сайёҳӣ ва мероси фарҳангии Ӯзбекистон, Иттиҳодияи ҳунарии “Ҳунарманд” ва дигарон роҳандозӣ шуд.
Дар кори ҷашнвора намояндагони Қазоқистон, Қирғизистон, Тоҷикистон, Малайзия, Ҳиндустон, Туркия, Таиланд, Бангладеш, Индонезия, ИМА, Латвия, Муғулистон, Италия ва дигар кишварҳо иштирок карданд.
Дар доираи чорабинӣ намоишгоҳи маҳсули кори дастии ҳунармандону косибон, намоиши мӯд, конфронси илмӣ-амалӣ ва миёни намояндагони Тоҷикистону Ӯзбекистон вохӯриҳои дуҷониба баргузор шуданд. Ҳамчунин дар Марғелон Осорхонаи таърихӣ боз шуда, дар он маснуоти кори дастии ҳунармандону косибони саросари дунё ба маърази тамошо гузошта шудаанд.
Ҳадаф аз баргузории ҷашнвора ҳифз ва тарғиби мероси фарҳангии ғайримоддӣ дар соҳаи нассоҷии анъанавии ӯзбек, инчунин беҳтар намудани сифат ва тарҳрезии ҳунарҳои мардумӣ дар тамоми соҳаҳои нассоҷии Ӯзбекистон, аз пахта то матоъҳои абрешимӣ, қолин, гулдӯзӣ ва тарроҳии либос мебошад.
