Пас аз баргузории Рӯзҳои фарҳангии Тоҷикистон дар Эрон, ҳамакнун дар чор шаҳри бузурги кишвар “Рӯзҳои фарҳангии Ҷумҳурии Исломии Эрон дар Тоҷикистон” баргузор мегардад. Дар ин бора Марям Холиқзода, сухангӯи Вазорати фарҳанги Тоҷикистон ба “Азия-Плюс” хабар дод.
Ба гуфтаи ӯ, Муҳаммадмаҳдии Исмоилӣ, вазири фарҳангу иршоди исломии Эрон ҳоло барои ифтитоҳи ҳафтаи фарҳангии кишвараш вориди Душанбе шудааст.
Дар ин робита Зулфия Давлатзода ва Муҳаммадмаҳдии Исмоилӣ, вазирони фарҳани ду кишвар, субҳи имрӯз, бо ҳам мулоқот анҷом додаанд.
“Ҳафтаи фарҳангии Эрон дар шаҳрҳои Душанбе, Хуҷанд, Бохтар ва Кӯлоб бо ҳузури 60 нафар намояндагони мақомоти расмӣ, фарҳангӣ ва ҳунарии ин кишвар баргузор мешавад”, – гуфт Холиқзода.
Марям Холиқзода афзуд, ифтитоҳи расмии “Рӯзҳои фарҳангии Ҷумҳурии Исломии Эрон дар Тоҷикистон” соати 17:00-и имрӯз дар театри давлатии академии опера ва балети ба номи Садриддин Айнӣ дар Душанбе хоҳад гузашт.
Ҳамин тавр, ба иттилои дастрас, пагоҳ, соати 14:00-и 1-уми ноябр, ҳунарҳои мардумии эрониён дар Осорхонаи миллии Тоҷикистон ба намоиш гузошта мешавад ва соати 17:00 маҳфили адабӣ бо иштироки шоирону Эрону Тоҷикистон дар толори Иттифоқи нависандагони Тоҷикистон баргузор мегардад.
Ҳамчунин, дар рӯзи 2-юми ноябр маҳфили “Шоҳномахонӣ” дар Донишгоҳи миллии Тоҷикистон ва Донишгоҳи омӯзгории Тоҷикистон пешбинӣ мешавад.
Намоиши филмҳои “Писарони дарё”, “Тахтӣ” ва “Роҳи обии абрешим” низ дар Кохи Наврӯз ва Кинотеатри Ватан дар Душанбе дар назар гирифта шудааст.
“Рӯзҳои 3 ва 4-уми ноябр ҳайати меҳмонон дар шаҳрҳои Хуҷанд, Бохтар ва Кулоб рӯзҳои фарҳангиро идома медиҳанд”, – афзуд Марям Холиқзода.
Дар ин робита аз Сафорати Эрон дар Тоҷикистон ҳам ба “Азия-Плюс” таъйид карданд.
“Дар ҳафтаи фарҳангии Эрон дар Тоҷикистон қарор аст, бархе аз зарфиятҳо, тавлидот, дастовардҳо ва тавонмандиҳову халлоқиятҳои ҳунармандони Эрон дар арсаҳои ҳунар ва мусиқӣ ба намоиш гузошта мешавад”, – гуфтанд дар сафорат.
Ба гуфтаи манобеъ, рӯзҳои фарҳангии Эрон дар Тоҷикистон як ҳафта идома карда, рӯзи 6-уми ноябр ба анҷом мерасад.
Ёдовар мешавем, ки дар ибтидои моҳи октябр “Рӯзҳои фарҳангии Тоҷикистон дар Эрон” баргузор гардида буд. Ин чорабинӣ дар Теҳрон, Табрез ва Шероз баргузор гашта ва Зулфия Давлатзода, вазири фарҳанги Тоҷикистон ва дигар ҳунармандону овозхонони тоҷик ширкат варзида буданд.
