Раёсати Вазорати корҳои дохилӣ дар шаҳри Душанбе (РВКД) сарозер шудани таксиро аз болои пули хиёбони Исмоили Сомонии шаҳри Душанбе шарҳ дод. Ин ниҳод гуфт, ҳодиса тақрибан соати 13:10-и имрӯз рух дод ва маҳз суръати баланд боиси садама шудааст. Дар ин садама як нафар захмӣ гардидааст.
Раёсати ВКД дар шаҳри Душанбе бо пахши иттилоия гуфт, ронандаи автомошинаи "Киа Рио" Хуршед Ҳалимов “дар натиҷаи бо суръати баланд дар болои купруки хиёбони И.Сомонӣ ҳаракат намудан, аз уҳдаи идораи воситаи нақлиёт набаромада, ба панҷараи оҳанини канори чапи роҳ бармехӯрад”.
“Дар натиҷа, панҷараи оҳанини канори роҳ шикаста, воситаи нақлиёти тамғаи "Киа Рио" аз баландии 6,35 метр бо қисми пеш ба роҳи автомобилгарди кӯчаи Н.Ганҷавӣ сарозер мегардад”, – гуфта шудааст дар хабари Раёсати ВКД дар шаҳри Душанбе.
Ин ниҳод менависад, ки ҳангоми рух додани ин ҳодиса, аз зери пул автобус мегузашт ва панҷараи шикаста “ба оинаи тарафи чапи автобуси мусофирбар, рақамҳои қайди давлатиаш 1251ТТ09, бархӯрда, ба нақлиёти мазкур зарари техникӣ расонидааст”.
Бино бар навиштаи Раёсати ВКД дар шаҳри Душанбе дар пайи ин ҳодиса як мусофири автомашинаи тамғаи "Киа Рио", ҷавондухтари 18-солаи сокини шаҳри Душанбе, ҷароҳати ҷисмонӣ бардошта, дар беморхона бистарӣ карда шудааст.
Гуфта мешавад, ки оид ба ҳолати мазкур маводҳои лозима тартиб дода шуда, санҷиш ҷараён дорад.
Ёдовар мешавем, ки аксу навори сарозер шудани як таксӣ аз болои пули хиёбони Исмоилӣ Сомонӣ баъди зуҳри имрӯз, 28-уми ноябр, дар шабакаҳои иҷтимоӣ нашр гардида, боиси ҳадсу гумонҳои зиёд гардид.
