Китоби чанд шоиру нависанда ва публисисту мутарҷими тоҷик дар як озмуне, ки имрӯз, 15-уми декабр Вазорати фарҳанг таҳти унвони “Китоби сол-2022” дар бахшҳои гуногун баргузор кард, ҳамчун китобҳои беҳтарини соли 2022 эътироф гардидаанд. Дар ин бора аз Вазорати фарҳанг ба “Азия-Плюс” хабар доданд.
Манбаъ гуфт, дар бахши назм китоби “Ҳаҷми нигоҳ”-и Давлати Раҳмониён ҳамчун китоби беҳтарини соли 2022 эълон шуд. Китобҳои “Боғ дар оғӯши борон”-и Сафари Амирхон ва “Орзуи сабз”-и Абдулқаҳори Мӯсо дар ин номинатсия сазовори ҷойҳои дуввум ва сеюм гардиданд.
Ҳамин тариқ, дар бахши наср, китоби “Зинаҳои дӯзах”-и Ато Ҳамдам ҳамчун китоби беҳтарин насри соли 2022 эълон гардид. Ду китоби дигар дар ин бахш, “Чароғи нигоҳ”-и Сайдаҳмади Зардон ва “Ҳар давру ҳар мард”-и Тоҳири Маҳмадризо дар ҷои дуввум ва сеюм қарор гирифтанд.
ИЗОБРАЖЕНИЕ
Китоби “Дастовез”-и Абдулҳамид Самад дар бахши асарҳои публисистӣ ҳамчун китоби беҳтарини соли равон эълон гардид. Ду китоби дигар дар ин бахш, “Аз дирӯзу имрӯзи адабиёти тоҷик”-и Абдураҳмон Абдуманнонов ва “Офтобе дар миёни сояе”-и Беҳрӯзи Забеҳуллоҳ сазовори ҷойҳои дуввум ва сеюм гардиданд.
Дар номинатсияи асарҳои назми адабиёти бачагона китоби “Машқи ҳисоб”-и Ҷӯра Ҳошимӣ ва дар номинатсияи асарҳои насри бачагона китоби “Саги кӯр”-и Маҷид Салим ҳамчун китобҳои беҳтарини соли 2022 дар ин бахшҳо эътироф шудаанд.
Китоби “Ширангубин”-и Раҳмат Назрӣ ва китоби “Қанди додо”-и Нуруллоҳи Ориф дар бахши асарҳои назми бачагона ва китобҳои “Тӯй дар беша”-и Гулчеҳра Маҳмадиева (бо забони русӣ ва англсисӣ) ва “4+4”-и Бежани Ризо (ТҶБ “Истиқбол”) дар бахши асарҳои насрии бачагона сазовори зинаҳои дуввуму сеюм гардиданд.
Тарҷумаи “Аз Ховар то Бохтар”-и Муъмин Қаноат дар бахши асарҳои тарҷумаи бадеӣ ҳамчун китоби беҳтарини соли 2022 эътироф гардид.
Осори Саттор Турсун “Шабе дар роҳ” дар тарҷумаи Амонбой Ҷумаев “Бер кеча йӯлда” сазовори ҷои дуюм ва “Афсонаҳои халқҳои ҷаҳон” дар тарҷумаи Саломат Исобоева дар ин наминатсия соҳиби ҷои сеюм гардиданд.
Вазорати фарҳанг мегӯяд, ғолибон бо диплом, мукофотҳои пулӣ ва тӯҳфаҳои хотиравӣ сарфароз шуданд.
Бояд гуфт, ки озмуни мазкур ҳамасола аз тарафи Вазорати фарҳанги баргузор гардида, ҳадафи он дарёфти беҳтарин асарҳои бадеӣ ва илмӣ-тадқиқотии муосири тоҷик мебошад.
Ёдовар мешавем, ки соли гузашта китоби «Сипоҳи сухан»-и Беҳрӯзи Забеҳулло дар номинаи китоби назм ва «Кайфар»-и Дилвари Мирзо дар номинаи китоби наср ҳамчун китоби соли 2021 эълон гардида буданд.
