Милитсияи шаҳри Душанбе аз боздошт ва ҳабси 3 қиморбоз ё онҳое, ки мардумро ба истилоҳ ба бозии “алик-малик” ҷалб мекунанд, хабар дод.
Раёсати ВКД дар шаҳри Душанбе аз онҳо Самандар Юнусови 27-сола, Комил Ризоеви 38-сола ва Шарофиддини Иноятшоҳи 22-сола ном бурдааст.
Гуфта мешавад, ки номбурдагон қаблан низ барои ин кирдор ба ҷавобгарӣ ҷалб гардида, ҷиҳати минбаъд такрор накардан, расман огоҳ карда шуда будаанд.
“Вале бар хилофи талаботи қонунгузорӣ амал намуда, боз ба қиморбозӣ машғул шудаанд”, – омадааст дар хабарномаи РВКД дар шаҳри Душанбе.
Ин ниҳод мегӯяд, нисбати ин се нафар барои итоат накардан ба талаботи қонунии кормандони милитсия тибқи моддаи 479-и Кодекси ҳуқуқвайронкунии маъмурии Ҷумҳурии Тоҷикистон протоколи маъмурӣ тартиб дода шуда, 10 ва 15 шабонарӯзӣ ҳабс шуданд.
“Бо мақсади пурра решакан намудани ин кирдори номатлуб ва ба инобат гирифтани дархосту пешниҳодҳои шаҳрвандон тавассути шабакаҳои интернетӣ, дар асоси дастуру супоришҳои роҳбарияти мақомоти милистия пойтахт, дар ҳудуди шаҳри Душанбе рейду амалиёти махсус роҳандозӣ гардида истодааст”, – мегӯяд РВКД дар шаҳри Душанбе.
РВКД дар шаҳри Душанбе аз сокинон ва меҳмони пойтахт даъват кардааст, ки дар сурати шоҳиди чунин ҳодиса гардидан, тавассути телефон навор ва ё акс гирифта, ҷиҳати баррасӣ ба милитсияи пойтахт ирсол намоянд.
Қиморбозӣ ё ба истилоҳи мардумӣ “алик-малик” падидаест, ки баъзан дар кӯчаҳои пойтахт, асосан дар назди бозорҳо ва маконҳои ҷамъшавии одамон ба чашм мерасанд. Ташкилкунандагони он, ки маъмулан чанд нафаранд, мардумро бо ваъдаи бурди маблағ ба бозӣ ҷалб мекунанд. Онҳо ба воситаи пинҳон кардани саққо дар зери се “қуттӣ” ба чашмбандӣ машғул мешаванд.
Мақомот инро падидаи номатлуб ва ғайриқонунӣ мегӯянд ва ҳамасола чанд нафарро боздошт ва ҳабси маъмурӣ мекунанд.
