Тоҷикистон дар гузориши Шохиси ҷаҳонии сулҳ (GPI) барои соли 2022 дар байни 163 кишвар мақоми 92-умро ишғол кардааст. Ин 5 зина болотар аз соли 2021 мебошад.
Тибқи гузориши ахири Шохиси ҷаҳонии сулҳ миёни кишварҳои Осиёи Марказӣ Ӯзбекистон бо ишғоли мақоми 86-ум амнтарин кишвар муаррифӣ гардидааст.
Ҳамин тавр, дар ин шохис Қирғизистон дар ҷойи 91-ум, Қазоқистон дар ҷойи 97 ва Туркманистон дар ҷойи 104-ум қарор доранд.
Ин арзёбӣ, ки рӯзи душанбе, 2-юми январ, нашр шуд, вазъияти амниятии 163 кишвари ҷаҳонро баррасӣ кардааст.
Дар ин шохис Исландия амнтарин кишвари ҷаҳон муаррифӣ гардидааст. Дар даҳгонаи амнтарин кишварҳои ҷаҳон ҳамчунин, Зеландияи Нав, Ирландия, Дания, Австрия, Португалия, Словения, Чехия, Сингапур ва Ҷопон ворид гардидаанд.
Эстония-мақоми 33-юм, Латвия-мақоми 35-ум ва Литва–мақоми 37-умро соҳиб шуда, амнтарин кишварҳо дар паҳнои Иттиҳоди Шуравии собиқ муаррифӣ шудаанд.
Афғонистон ноамнтарин кишвари ҷаҳон унвон шудааст. Ин давлат дар зинаи 163-юм қарор дорад. Ин маротибаи 6-ум аст, ки Афғонистон пайиҳам ноамнтарин кишвар дар ҷаҳон эътироф мегардад.
Дар даҳгонаи ноамтарин кишварҳои ҷаҳон Яман, Сурия, Русия, Судони Ҷанубӣ, ҶД Конго, Ироқ, Сомалӣ, ҶМ Африқо ва Судон шомил шудаанд.
Украинаи ҷангзада бошад дар мақоми 153-юм қарор дорад.
Шохиси ҷаҳонии сулҳ афзудааст, ки вазъи амниятии 90 кишвари ҷаҳон беҳбуд ёфта ва 71 кишвари дигар ноамнтар шудаанд.
Шохиси ҷаҳонии сулҳ гузоришест, ки тавассути Пажӯҳишгоҳи иқтисод ва сулҳ таҳия гардида, мавқеияти нисбии сулҳомез будани кишварҳо ва манотиқро месанҷад. Бар асоси гузориши Шохиси ҷаҳонии сулҳ дар даҳсолаи ахир кишварҳои ҷаҳон нисбат ба сулҳ бештар ба хушунат рӯ овардаанд.
