Фирдавс Шарифзода, раиси шаҳри Хуҷанд имрӯз, 30-юми январ, дар нишасти хабарӣ мушкили асосии автобусҳои шаҳрро шарҳ дод. Ба гуфтаи шаҳрдор, айни замон 80%-и автобусҳо дар ҳолати корӣ қарор дошта, аммо бо сабаби гаронии нархи сӯзишворӣ наметавонанд хароҷоти худро рӯйпӯш кунанд.
Ба гуфти Шарифзода, барои талаботи шаҳрвандонро қонеъ кардан бояд дар муддати муайян автобусҳо то истгоҳ ҳозир шаванд, чун қаблан дер омадани онҳо боиси норозигии сокинон гардида буд.
“Барои ин ҳоло хатти ҳаракати автобусҳо муайян карда мешавад, инчунин дар назар аст, 50 адад электробусҳо низ харидорӣ гардад, то эҳтиёҷоти мардум бароварда шавад”, – афзуд шаҳрдори Хуҷанд.
Бояд гуфт, дар нишасти матбуотии қаблӣ ҳам мушкили автобусҳо матраҳ шуда буд. Он вақт шаҳрдор гуфта буд, ки 30-35 адад афтобусҳое, ки дар хатти мусофиркашонӣ ҳастанд, бениҳоят кам аст. Дар ҳудуди шаҳр бояд 70-80 автобус ба кор барояд.
Масъулини идораи нақлиёти мусофиркашонии шаҳри Хуҷанд дар посух ба саволи журналистон гуфта буданд, ки яке аз сабабҳои асосии кам ба кор баромадани автобусҳо таътили тобистонаи хонандагон аст. Аммо имрӯз таътил набошад ҳам, ангуштшумор будани автобусҳо дар шаҳр баръало мушоҳида мегардад.
Гуфтан ба маврид аст, ки то вуруди автобусҳо ба шаҳри Хуҷанд, яъне то соли 2018, шикоятҳо аз риоя нашудани қоидаҳои ҳаракат дар роҳ ҳангоми мусофиргирӣ, зиёд гирифтани мусофирон, тамбашавии микроавтобусҳо дар кӯчаҳои марказии шаҳр, ҷалби ноболиғон ба микроавобусҳо барои пулчинӣ, бо либосҳои хонагӣ идора намудани микроавтобус ва ғайраҳо дар сомонаҳои иҷтимоӣ зиёд мечархид.
Ёдовар мешавем, ки масъулини ҳукумати вилояти Суғд ва шаҳри Хуҷанд бо назардошти шикоятҳои болоӣ ҳаракати автобусҳоро дар шаҳр зарур дониста, ба шаҳри Хуҷанд 100 адад автобусро харидорӣ карданд, аммо мушоҳида мешавад, ки ин ҳам ҳоло мушкили нақлиёти шаҳрро ба пуррагӣ ҳал накардааст.
