Музди меҳнати миёнаи моҳонаи номиналӣ дар Тоҷикистон дар моҳи январи соли ҷорӣ 1878 сомонӣ (184 доллар)-ро ташкил дод, ки дар муқоиса бо моҳи пешин 12,3% камтар аст, гуфта мешавад дар гузориши ахири омории “Вазъи иҷтимоӣ-иқтисодӣ дар ҶТ”.
“Сатҳи музди меҳнати воқеӣ (бо назардошти таваррум) дар моҳи январи соли 2023 нисбат ба моҳи декабри соли 2022 ба андозаи 12,7% кам шуд”, – зикр мешавад дар гузориш.
Ҳаҷми музди меҳнати ҳадди ақал (минималӣ) дар ҷумҳурӣ 600 сомонӣ (55 доллар)-ро ташкил медиҳад.
Маоши нисбатан баландро дар моҳи аввали имсол кормандони бонк ва ширкатҳои суғурта гирифтаанд, ки маоши миёна дар онҳо 4861 сомонӣ (477 доллар) ва камтарро – кормандони бахши кишоварзӣ – 838 сомонӣ (82 доллар) гирифтаанд.
Дар ҳамин ҳол, дар гузориш гуфта мешавад, қарзи умумӣ аз пардохти музди меҳнат дар Тоҷикистон бо назардошти бақияи солҳои пешин то аввали моҳи феврали соли 2023 зиёда аз 28,6 млн сомонӣ (ҳудуди 2,8 млн доллар)-ро ташкил медиҳад.
Қарзи нисбатан зиёдтар аз пардохти маош дар соҳаҳои истихроҷи канданиҳои фоиданок – ҳудуди 15,2 млн сомонӣ (53,1% аз ҳаҷми умумии қарз) ва соҳаҳои нақлиёт ва нигаҳдории бор – зиёда аз 6,2 млн сомонӣ (21,7%) ба қайд гирифта шудааст.
Моҳи январи соли ҷорӣ миқдори қувваи корӣ (бо шуғл таъминбудагон ва бекорони сабтшуда) дар кишвар ҳудуди 2,6 млн нафарро тташкил дод, ки 52 ҳазор нафарашон мақоми бекорӣ доранд.
Қобили зикр аст, ки тибқи маълумоти гуногун, аз аҳолии 10 миллионннафараи Тоҷикистон беш аз 2 млн шаҳрвандони ҷумҳурӣ дар берун аз ҳудуди кишвар кор мекунанд. Сабаби асосии ба хориҷи кишвар рафтани қувваи корӣ мавҷуд набудани кор бо маоши шоиста дар кишвар унвон мешавад.
Ёдрас мекунем, ки аз 1 марти соли равон музди меҳнати кормандони мақомоти ҳифзи ҳуқуқ ва хизматчиёни ҳарбӣ ба андозаи 25% ва дигар хизматчиёни давлатӣ -20% боло бурда шуд. Аз 1 июли соли ҷорӣ музди меҳнати кормандони соҳаҳои маориф ва тандурустӣ зиёд карда мешавад.
Дар ҳамин ҳол, байни кишварҳои минтақаи Осиёи Марказӣ ва Русия ҳаҷми музди меҳнати миёнаи моҳона дар Тоҷикистон пасттарин боқӣ мемонад.
Бино ба маълумоти расмӣ, то нимсолаи дуюми соли гузашта маоши миёна дар Қазоқистон 650 доллар, Туркманистон – 383 доллар, Ӯзбекистон – 335 доллар, Қирғизистон – 280 доллар ва Русия – 828 долларро ташкил дода буд.
