Дар Суғд бо ҷурми иштирок дар фаъолияти созмонҳои мамнуъ як ҷавон ба мӯҳлатӣ 5 сол равонаи зиндон шуда, як марди дигар баъди “худиқрорӣ ва таслимшавӣ” аз ҷавобгарӣ озод карда шудааст. Дар ин бора дар барномаи “Милитсия хабар медиҳад”-и Раёсати ВКД дар вилояти Суғд иттилоъ дода мешавад.
Ба гуфтаи манбаъ, Манучеҳр Комилҷонзода, як ҷавони 28-сола аз шаҳри Конибодом соли 2021 худро дар саҳифаи “Инстаграм” ба қайд гирифта, дар ин давра ба пахш намудани садо ва наворҳои мазмуну мӯҳтавои ифротгароидошта машғул шудааст.
“Гумонбар барои тарғиби ғоя ва пешрафти ҳизбу ҳаракатҳои фаъолияташон дар Тоҷикистон мамнӯъ эълоншуда, дар байни 1430 обуначиёнаш мусоидат намудааст”, – гуфта мешавад дар хабар.
Дар навор зикр мешавад, ки Манучеҳр Комилҷонзода дар давоми фаъолияташ 455 наворе, ки ба ташкилотҳои террористиву экстромистӣ рабт дорад, паҳн кардааст.
Аммо зикр намегардад, ки дар наворҳо оид ба кадом ташкилотҳои террористиву экстромистӣ сухан меравад ва ғояҳои кадом созмони мамнуъ тарғиб мегардад.
Алайҳи ӯ тибқи моддаи 307, иловаи 3, қисми 2-и Кодекси ҷиноятии Тоҷикистон парвандаи ҷиноятӣ боз гардида, баъди тафтишот, Суди шаҳри Хуҷанд Манучеҳр Комилҷонзодаро ба 5 соли зиндон бо адо кардани ҷазо дар калонияҳои ислоҳии дорои низомаш пурзӯр маҳкум намудааст.
Дар ин баробар, ба иттилои ахбори Раёсати ВКД дар вилояти Суғд, Акрамҷон Солиев, марди 45-солаи сокини ноҳияи Бобоҷон Ғафуров барои фаъолият дар ташкилотҳои мамнӯъ гумонбар дониста шуда, бар зидди ӯ низ бо моддаи 307, иловаи 3, қисми 2-и Кодекси ҷиноятӣ парвандаи ҷиноӣ боз гардидааст.
“Гумонбаршаванда тавассути шабакаҳои иҷтимоӣ ба доми мубаллиғони ифротӣ афтода, ба бадномкунии мақомоти давлатии Тоҷикистон машғул шуд”, – гуфта мешавад дар навори ахбор.
Ин кирдори Акрамҷон Солиев боис шудааст, ки моҳи декабри соли 2022 дар ғайбаш парвандаи ҷиноӣ кушода шавад. Маълум нест, ки номбурда дар кадом кишвар қарор дошт, вале “бо мусоидати мақомоти милитсия ӯ гумроҳзадагиашро дарк карда, аз хориҷи кишвар ба ватан баргаштааст”.
Дар навор зикр мешавад, ки баъди “худиқрорӣ, даст кашидан аз ҷинояткорӣ ва изҳори пушаймонӣ” гумонбаршаванда афв шудааст.
Акрамҷон Солиев дар навори Раёсати ВКД дар вилояти Суғд танҳо мегӯяд, ки "ман намедонистам, ки ин кори ман ғайриқонунӣ аст ва аз кардаи худ пушаймонам. Дар оянда нақша дорам, ки ба ватанам хизмат кунам".
Бояд гуфт, ки моддаи 307, иловаи 3, қисми 2-и Кодекси ҷиноятӣ “иштирок дар фаъолияти ҳизбҳои сиёсӣ, иттиҳодияҳои ҷамъиятӣ, динӣ ё дигар ташкилоте, ки нисбати он аз ҷониби суд қарори эътибори қонунӣ пайдокарда, дар бораи барҳам додан ё манъи фаъолияташ бинобар сабаби ба амал баровардани фаъолияти экстремистӣ қабул шудааст, инчунин мусоидат кардан ба фаъолияти онҳо бо истифода аз воситаҳои ахбори омма, шабакаи интернет ва ё ба тарзи дигар”-ро дарбар гирифта, ба гумонбаршаванда аз 5 то 8 сол зиндон муқаррар гардидааст.
Ёдовар мешавем, ки бо моддаи 307-и Кодекси ҷиноятии Ҷумҳурии Тоҷикистон то имрӯз даҳҳо нафар гумонбар ва ба солҳои гуногун равонаи зиндон шудаанд. Аз ҷумла, соли сипаришуда 4 рӯзноманигори тоҷик бо бандҳои ин моддаи Кодекси ҷиноятӣ маҳкум шуда, аз 7 то 10 сол зиндонӣ гардиданд.
