Аз 22 то 24-уми июн дар Қасри варзиш шаҳри Хуҷанд Намоишгоҳи IX-уми байналмилалии “Суғд-2023” баргузор мешавад. Дар ин бора Палатаи савдо ва саноати вилояти Суғд хабар медиҳад.
Ба иттилои манбаъ, ҳадафи намоиш роҳандозии ҳамкориҳои бо кишварҳои дигар, ҷалби сармоя ва воридоти технологияҳои муосир, муаррифии маҳсулоти корхонаҳои истеҳсолии Тоҷикистон мебошад.
Дар доираи ин форуми тиҷоратӣ ва сармоягузорӣ имзои созишномаҳои ҳамкорӣ бо шарикони рушд дар назар аст.
Ёдовар мешавем, ки Намоишгоҳи байналмилалии “Суғд” сар аз соли 2014 инҷониб дар шаҳри Хуҷанд баргузор мешавад ва тоҷикону меҳмонон аз даҳҳо мамолики олам дар он ширкат меварзанд.
Соли 2022 беш аз 500 меҳмон аз Русия, Қазоқистон, Ӯзбекистон, Беларус, Эрон, Чин, Туркия ва Арабистони Саудӣ дар чунин ярмарка ширкат карда, 60 шартнома имзо гардида буд.
