Шаби 11 ба 12 июн дар шаҳри Екатеринбурги Русия бо иштироки зодагони Тоҷикистон ҷанҷолу занозании гурӯҳӣ доир гардида, дар натиҷа ду нафари соли таваллудашон 1984 ва 2002 – Темур Исмоилов ва Ҳофиз Ниёззода аз зарби корд ҳалок шуданд.
Тавре ки "Коммерсантъ" хабар медиҳад, шоми 11 июн Темур Исмоилов бо писари 19-солааш аввал дӯсташро аз шаҳраки Малий исток гирифта, сипас барои вохӯрӣ бо “ҳамкоронаш” ба Екатеринбург меравад.
Соати 3:10 онҳо назди мағозаи “Монетка” дар кӯчаи Бардин мефароянд. Баъди чанде автомашинаи Nissan ба он ҷо меояд ва аз дохилаш 6 нафар мардон мебароянд. Байни онҳо зодагони Тоҷикистон Кенҷабой Назарзода ва Сипар Юсупов ҳузур доштаанд. Шахсияти дигар иштирокчиёни вохӯрӣ ҳозир аз ҷониби мақомоти қудратӣ муайян карда мешавад.
Темур Исмоилов ҳамроҳи дӯсташ назди мардон баромада, оромона бо ҳам суҳбат доштаанд. Сипас автомашинаи Hyundai Elantra назди мағозаи “Монетка” омада, аз дохилаш 4 нафар мардон мефароянд. Мақомот муайян кардаанд, ки миёни онҳо шаҳрвандони Тоҷикистон Ғаффор Ғаффорзода ва Илёс Бобиев будаанд.
ИЗОБРАЖЕНИЕ Мағозаи "Монетка" дар кӯчаи Бардини Екатеринбург
Сипас ҷанҷоли гурӯҳӣ ба амал омада, дар ҷараёни он Бобиев бо корд ба ҷисми Темур Исмоилов ва дигар мардони паҳлӯяш зарба мезанад. Вақте кормандони пулис ба ҷойи ҳодиса меоянд, ҷасадҳои Темур Исмоилов ва Ҳофиз Ниёззодаро дарёфт мекунанд. Бо 3 нафар дигари иштирокчиёни ҷанҷол бо ҷароҳатҳо дар бемористони №36-и шаҳр бистарӣ шудаанд.
Раиси Кумитаи тафтишоти Русия Александр Бастрикин дастур додааст, ки дар бораи ҷараёни тафтишот ва ҳолатҳои дигари қазия шахсан ба ӯ гузориш диҳанд.
Ҳамчунин хабар дода мешавад, ки Илёс Бобиев мавриди ҷустуҷӯи федералӣ эълон шуда, Ғаффор Ғаффорзода пас аз ҳодиса Русияро тарк кардааст.
“Разборка”-и соф тоҷикӣ
Роҳбари диаспораи тоҷикони Урал Фаррух Мирзоев ба портали E1.RU хабар додааст, ки ҳарду ҳалокшудагон дар як сохтмоне дар Екатеринбург кор мекардаанд. Ба гуфтаи ӯ, яке аз дигаре пул қарздор буда, бо одамони худаш барои ҳалли масъала омадааст, ки дар натиҷа муноқиша шудааст.
“Ин ҷо ҳалли масъала байни танҳо тоҷикон буд. Аввал муноқишаи лафзӣ карда, сипас кордкашӣ кардаанд, ки дар натиҷа ду кас ҳалок шуданд, – гуфтааст Мирзоев. – Ягон пул ба умри инсон намеарзад. Мо бо мақомоти ҳифзи ҳуқуқ ҳамкорӣ карда, ба ҳама гуна мусоидату кумак омодаем”.
Ба қавли вай, кормандони мақомот фавран чораҳо андешида, гунаҳкоронро, ки пинҳон шуданӣ буданд, дар Қазоқистон боздошт кардаанд. Дар Кумитаи тафтишоти Русия дар вилояти Свердловск изҳор доштаанд, ки алҳол чунин маълумот дар даст надоранд.
Ҳамчунин, ба гуфтаи Фаррух Мирзоев, миёни ҳамлагарон варзишгари шинохтаи қувваозмоиҳои бидуни қоида дар Ектаеринбург Суҳроб Давлатов ҳам будааст. Ба иттилои манбаи E1.RU, айни замон ӯ боздошт шудааст.
ИЗОБРАЖЕНИЕ Суҳроб Давлатов
Дар Кумитаи тафтишот ҳоло аз шарҳи масъалаи ба Давлатов дахлдошта худдорӣ кардаанд.
“Аз рӯи ин далел мақомоти тафтишоти Кумитаи тафтишоти Русия парвандаи ҷиноятиро тафтиш карда, ҳамаи ҳолатҳои ҳодиса муайян карда мешавад”, – гуфтаанд дар ин ниҳод.
