Абдулло Шарифов, як зоири тоҷик, ки 18-уми июн дар шаҳри Маккаи Арабистони Саудӣ даргузашт, дар Тоҷикистон аз ташхиси тиббӣ гузаштаву ба Кумитаи дин, танзими анъана ва ҷашну маросим маълумотномаи тиббӣ пешниҳод карда будааст.
Афшини Муқим, сухангӯи Кумитаи дин, танзими анъана ва ҷашну маросим, ки масъули фиристодани сокинон ба ҳаҷ аст, ба “Азия-Плюс” гуфт, ки Абдулло Шарифов рӯзи 13-уми июн барои адои маросими ҳаҷ аз Тоҷикистон ба Арабистони Саудӣ парвоз карда буд ва пас аз панҷ рӯз, 18-уми июн даргузашт.
“Ҳама зоирон пеш аз сафар ба Арабистони Саудӣ ба Кумитаи дин, танзими анъана ва ҷашну маросимҳои Тоҷикистон дар хусуси гузаштани ташхиси тиббӣ маълумотнома пешниҳод мекунанд. Ба онҳое, ки вазъи саломатиашон хуб нест, иҷозати сафар дода намешавад”, – гуфт Афшини Муқим.
Ба гуфтаи сухангӯи ин ниҳод, Абдулло Шарифов низ қабл аз сафар ба Арабистони Саудӣ аз ташхиси тиббӣ гузаштаву дар ин хусус маълумотнома пешниҳод карда будааст. Вазъи саломатиаш низ хуб арзёбӣ мешуд.
“Давоми наздики як ҳафта, ки дар Макка қарор дошт, вазъи саломатиаш хуб буд. Рӯзи 18-уми июн Абдулло Шарфов даргузашт. Баъдан маълум шуд, ки ӯ бемории дил доштааст”, – гуфт Афшини Муқим.
Ин ҳоҷии даргузаштаи тоҷикро 19-уми июн дар яке аз қабристонҳои шаҳри Макка ба хок супориданд.
Гуфтан ба маврид аст, ки дар хусуси даргузашти ҳоҷии тоҷик дар Арабистони Саудӣ, зимни адои маросими ҳаҷи имсола, Радиои Озодӣ иттилоъ дод. Ба навиштаи ин расона, Абдулло Шарифов сокини ноҳияи Мастчоҳ буд.
Имсол сафари зоирони тоҷик барои адои маносики ҳаҷҷи фарзӣ 10-уми июн оғоз шуд ва гуфта мешавад, ки то 20-уми июн давом мекунад.
Дар маросими адои маносики ҳаҷи имсола 7 ҳазор шаҳрванди Тоҷикистон ба Арабистони Саудӣ мераванд.
