Рӯзи 5 июл дар хиёбони Рӯдакии шаҳри Душанбе садамаи нақлиёт рух дода, бар асари он 2 нафар ҳалок шуданд.
Тавре ки хадамоти матбуоти Кумитаи ҳолатҳои фавқулодаи ҷумҳурӣ хабар медиҳад, мошини сабукрави Mercedes-Benz зери идораи сокини 26-солаи ноҳияи Варзоб ҳангоми ҳаракат аз Душанбе ба самти ноҳия ба автомашинаи боркаши “Дулан” бармехӯрад.
“Ҳангоми садама дар дохили мошини сабукрав мусофирзани 54-сола, сокини ноҳияи Варзоб қарор дошт. Бар асари садама ронанда ва мусофири автомашинаи Mercedes-Benz дар ҷойи ҳодиса ҳалок шуданд”, – хабар медиҳад дафтари матбуоти Кумита.
Гуфта мешавад, имдодгарони Раёсати КҲФ дар шаҳри Душанбе ҷасади ҳалокшудагонро аз мошини пачақшуда берун оварда, ба мақомоти ҳифзи ҳуқуқ супоридаанд.
Зимнан зикр мегардад, ки ронандаи автомашинаи боркаш ҷароҳатҳои гуногун бардоштааст.
