Дар се рӯзи охир 3 нафар сокинони ноҳияи Бобоҷон Ғафуров бо мақсади худкушӣ худро ба дарёву обанборҳо партофтаанд. Масъулин тавонистаанд, ки як нафарро наҷот диҳанд, ду нафари дигар ба ҳалокат расидаанд.
Диловар Ҳамдамов, масъули бахши матбуоти Раёсати Кумитаи ҳолатҳои фавқуллода ва мудофиаи гражданӣ (КҲФ) дар вилояти Суғд дар сӯҳбат ба “Азия-Плюс” гуфт, як ҷавони 28-солаи сокини ноҳияи Бобоҷон Ғафуров бо мақсади худкушӣ худро аз болои “Пул кӯҳна”-и шаҳри Хуҷанд ба дарёи Сир партофтааст.
Ба гуфтаи ӯ, ин ҳодиса рӯзи 19-уми июл рух дода ва ӯро кормандони ин ниҳод наҷот доданд.
“Наҷотдиҳандагон баъди расонидани кӯмаки аввалияи тиббӣ, ӯро ба беморхонаи Ёрии таъҷилии шаҳри Хуҷанд интиқол доданд. Вазъи саломатии ҷавон ҳоло хуб аст”, – гуфт масъули Раёсати КҲФ.
Сабаби аз болои пул худро ба дарё партофтани ӯро кормандони мақомоти ҳифзи ҳуқуқи вилоят таҳқиқ мекунанд.
Гуфта мешавад, ки рӯзи ҳодиса кормандони милитсия бо ҷавон ҳамсӯҳбат шуда, сабаби худкушиашро аз ӯ пурсидаанд. Аммо масъулин сабаби ба худкушӣ даст задани вайро ироа намекунанд.
Ҳамин тавр, рӯзҳои 17-19-уми июл як зани тахмин 35-сола ва як ҷавони 19-соли сокини ҷамоати Исфисор ноҳияи Бобоҷон Ғафуров дар дарёи Сир ғарқ шуда, ба ҳалокат расидаанд.
Бояд гуфт, ки ба гуфтаи масъулин, дар мавсими оббозӣ, яъне 1-уми июн то 21-уми июл 12 ҳолати дар дарёву кӯлу обанборҳо ғарқшавии сокинон ба қайд гирифта шудаааст.
Ёдовар мешавем, ки маҷмӯан дар давоми 6 моҳи соли равон 23 ҳолати ғақршавию ҳалокати сокинон дар обанборҳои шаҳрҳои Хуҷанду Гулистон ба қайд гирифта шудааст. Масъулин тавонистаанд, ки то кунун 6 нафарро аз марг наҷот диҳанд.
