Имсол раисҷумҳури Тоҷикистон Эмомалӣ Раҳмон “Дарси сулҳ”-ро дар Донишгоҳи давлатии тиббии Хатлон дар Данғара мегузаронад. Дар ин бора як манбаъ аз Вазорати маориф ва илми Тоҷикистон ба “Азия-Плюс” хабар дод.
Манбаъ гуфт, ки имсол “Дарси сулҳ” ё оғози соли нави таҳсил, рӯзи ҷумъаи 1-уми сентябр баргузор мешавад ва қарор аст, ки дар он рӯз Эмомалӣ Раҳмон дар Данғара бинои нави донишгоҳро расман ифтитоҳ кунад.
“Сараввал раисҷумҳури кишвар Эмомалӣ Раҳмон бинои нави Донишгоҳи давлатии тиббии Хатлонро ба истифода дода, баъдан бо омӯзгорон ва хонандагони ин муассисаи олӣ мулоқот мекунанд”, – гуфт ҳамсӯҳбати мо.
Ба гуфтаи ӯ, дар ин мулоқот Раҳим Саидзода, вазири маориф ва илми кишвар ҳам ширкат мекунад.
Бояд гуфт, ки Донишгоҳи давлатии тиббии Хатлон яке аз донишгоҳҳои навтаъсис буда, дар шаҳри Данғара воқеъ аст.
Ин муассисаи олӣ соли 2016 бо қарори Ҳукумати Тоҷикистон таъсис ёфтааст, 3 факултет дорад ва ҳудуди 2 ҳазор нафар донишҷӯён дар риштаи тиб ин ҷо таҳсил мекунанд.
Гуфтан ба маврид аст, ки ҳамасола Рӯзи дониш – 1-уми сентябр дар Тоҷикистон бо “Дарси сулҳ” оғоз меёбад. Дар ин дарс устодону шогирдон суханронии раисиҷумҳур Эмомалӣ Раҳмонро гӯш мекунанд.
Ёдовар мешавем, ки соли 2022 “Дарси сулҳ”-и Эмомалӣ Раҳмон дар Донишгоҳи давлатии тиббии Тоҷикистон баргузор гардида буд.
