Дар соли хониши ҷорӣ тақрибан 260 ҳазор нафар бори нахуст пой ба остонаи мактаб мениҳанд, хабар доданд ба “Азия-Плюс” аз Вазорати маориф ва илми Тоҷикистон.
Ин рақам дар муқоиса бо соли гузашта зиёдтар аст. Соли хониши гузашта зиёда аз 200 ҳазор нафар кӯдакон ба синфи 1-ум рафта буданд.
Ёдрас мекунем, ки дар нишасти матбуотии Вазорати маориф ва илми ҷумҳурӣ дар бораи норасоии омӯзгорон дар соли хониши гузашта хабар дода шуда буд.
Норасоии 3 ҳазору 434 омӯзгор бахусус дар фанҳои дақиқ – математика, физика ва кимиё ба мушоҳида расид.
Дар нишасти матбуотӣ зикр шуд, ки барои ҳалли ин масъала 4 ҳазору 347 нафар муаллимон ба шаҳру навоҳӣ фиристода шуда, онҳо бояд аз санҷиши дахлдор гузаранд ва сипас ба кор қабул карда шаванд.
Бино ба маълумоти Вазорат, имрӯз дар ҷумҳурӣ 3 ҳазору 967 мактаби таҳсилоти миёнаи умумӣ фаъолият доранд, ки дар онҳо 126 ҳазору 354 нафар омӯзгорон машғули коранд. Миёни онҳо 81 ҳазору 822 нафарашон занон мебошанд.
Теъдоди умумии хонандагон ба 2 млн 232 ҳазору 114 нафар расида, 1 млн 79 ҳазору 197 нафарашон духтаронанд.
Қобили зикр аст, ки дар соли хониши нав дар саросари кишвар 312 бинои нави мактабу кӯдакистонҳо ба истифода дода мешавад.
