Масъуд Турсунзода, писари калонии Мирзо Турсунзода, шоири маҳбуб ва Қаҳрамони Тоҷикистон субҳи имрӯз, 12-уми сентябр, дар Душанбе даргузашт. Ӯро имрӯз дар қабристони Сариосиёи пойтахт ба хок месупоранд.
Яке аз наздикони марҳум дар суҳбат бо “Азия-Плюс” гуфт, сабаби марги ӯ сактаи қалб аст, ҳарчанд чанд соли охир ӯ аз бемории қанд ранҷ мебурд.
Масъуд Турсунзода бо ихтисоси физик – радиотехник солҳо раҳбари Коллеҷи техникӣ (он замон сохтмон)-и Тоҷикистон буд ва вақтҳои охир дар бахши алоқаи мобилӣ фаъолият менамуд.
Мирзо Турсунзода соҳиби се фарзанд – ду писар ва як духтар буд.
Ду сол пеш, Парвиз Турсунзода, писари хурдии Қаҳрамони Тоҷикистон, ки риштаи шарқшиносии Донишгоҳи давлатии Тоҷикистонро хатм карда, ба ҳайси тарҷумон дар Ироқ, сипас дар студияи дубляжи “Тоҷикфилм” ва солҳои ахир дар ширкати “Вавилон” кор кард, даргузашта буд.
Аз фарзандони Мирзо Турсунзода ҳамакнун Фирӯза Турсунзода, фарзанди калонии ин шоири шинохта дар қайди ҳаёт аст. Фирӯза Турсунзода риштаи фалсафаи Донишгоҳи давлатии Маскавро хатм карда, умри худро ба таҳқиқоти илмӣ бахшид ва соҳиби унвони номзади илмҳои фалсафа ва профессор аст.
Мирзо Турсунзода соли 1911 дар Қаротоғ ба дунё омада, соли 1977 дар Душанбе аз олам чашм пӯшид ва дар оромгоҳи Лучоб ба хок супорида шуд. Мирзо Турсунзода аз соли 1939 то дами маргаш дар тӯли 38 сол раиси Иттифоқи нависандагони Тоҷикистон буд. Ӯ соли 1961 унвони Шоири халқии Тоҷикистон, соли 1967 унвони Қаҳрамони меҳнати сотсиалистиро ба даст оварда буд. Соли 2001, пас аз маргаш ба Турсунзода унвони аз ҳама баланди кишвар — Қаҳрамони Тоҷикистон дода шуд.
