Имрӯз ва рӯзи дигар ҳаракати нақлиёт дар қисмате аз роҳҳои Душанбе маҳдуд карда мешавад. Ин ба ташрифи сарони давлатҳои Осиёи Марказӣ ба Тоҷикистон вобаста аст.
Рӯзҳои 14-15-уми сентябр дар Тоҷикистон Вохӯрии V машваратии сарони давлатҳои Осиёи Марказӣ баргузор мегардад. Ба пойтахти кишвар сарони чор давлати минтақа – Ӯзбекистон, Қазоқистон, Туркманистон ва Қирғизистон меоянд.
Вобаста ба ин, ҳаракат дар қисмате аз роҳҳои Душанбе муваққатан маҳдуд мешавад, аз ҷумла:
– дар кӯчаи Аҳмади Дониш ва хиёбони Айнӣ – аз фурудгоҳи Душанбе то мавзеи Садбарг;
– хиёбони Рӯдакӣ – аз Садбарг то Бӯстонсаройи шаҳрӣ;
– хиёбони Исмоилӣ Сомонӣ – аз сероҳаи Рӯдакӣ то эстакадаи Қараболо;
– кӯчаи Низомии Ганҷавӣ то Карамова ва кӯчаи Ҳувайдуллоев то Шерализода.
Давоми ду рӯз сокинон метавонанд аз роҳҳои ҳамшафат истифода баранд.
Тибқи маълумоти Раёсати БДА, дар роҳҳо тариқи дигар кӯчаву хиёбонҳои пойтахт низ метавонанд маҳдудиятҳо ҷорӣ шаванд, вале кӯтоҳмуддат.
Тавре ки гуфтем, давоми ин рӯзҳо дар Душанбе Вохӯрии V машваратии сарони давлатҳои Осиёи Марказӣ доир гардида, ҳамчунин баргузории ҷаласаи Шӯрои сарони давлатҳои муассиси Фонди байнулмилалии наҷоти Арал дар назар аст.
Дар назар аст, ки аз рӯи натиҷаҳои Вохӯрии V машваратии сарони давлатҳои Осиёи Марказӣ як қатор санадҳо ба имзо расанд, ки Изҳороти муштараки сарони давлатҳои Осиёи Марказӣ аз ҷумлаи муҳимтарини онҳо хоҳад буд.
Қобили зикр аст, ки Вохӯрии машваратии сарони давлатҳои Осиёи Марказӣ мулоқоти ҳамасолаи маъмулан президентҳои панҷ кишвари минтақа буда, бонавбат дар яке аз ин панҷ кишвар баргузор мешавад.
