Субҳи имрӯз, 28-уми сентябр, раиси ҷумҳури Тоҷикистон Эмомалӣ Раҳмон ба Олмон сафар кард. Дар ин бора хадамоти матбуоти сарвари давлат иттилоъ медиҳад.
Ба гуфтаи манбаъ, Эмомалӣ Раҳмон барои иштирок дар вохӯрии сарони давлатҳои “Осиёи Марказӣ – Олмон” ба Олмон рафтааст.
Гуфта мешавад, ки дар ин сафар Эмомалӣ Раҳмонро вазири корҳои хориҷӣ, ёрдамчиёни президенти Тоҷикистон оид ба масъалаҳои робитаҳои хориҷӣ ва оид ба масъалаҳои иқтисодӣ, вазирони саноат ва технологияҳои нав, молия ва дигар шахсони расмӣ ҳамроҳӣ мекунанд.
Қаблан аз хадамоти матбуоти раиси ҷумҳури кишвар ба “Азия-Плюс” хабар дода буданд, ки ин сафар се рӯз – аз 28 то 30-юми сентябр идома мекунад.
Дар назар аст, ки дар ин сафар Эмомалӣ Раҳмон бо раиси ҷумҳури Олмон Франк-Валтер Штайнмайер ва садри аъзами Олмон Олаф Шолс мулоқот анҷом диҳад.
Интизор меравад, ки сарони кишварҳои Осиёи Марказӣ – Қазоқистон, Қирғизистон, Тоҷикистон, Туркманистон ва Ӯзбекистон низ дар ин мулоқот ширкат кунанд.
Гуфта мешавад, ки мавзӯъҳои асосии гуфтугӯ таҳкими ҳамкориҳои минтақавӣ ва иқтисодӣ, инчунин масъалаҳои ҳамкориҳо, ки барои минтақа ва Олмон муҳиманд, мебошанд.
Ёдовар мешавем, ки рӯзҳои 14-15-уми сентябр сарони 4 кишвари Осиёи Марказӣ ва Озарбойҷон дар шаҳри Душанбе мулоқот карда буданд. Баъд аз ин боз ҳам сарони давлатҳои Осиёи Марказӣ бо ИМА дидор доштанд.
