Рустами Эмомалӣ, раиси Маҷлиси миллии Маҷлиси Олии Ҷумҳурии Тоҷикистон барои иштирок дар ҷаласаи Шӯро ва ҷаласаи 56-уми пленарии Ассамблеяи Байнипарламентии давлатҳои иштирокчии Иттиҳоди Давлатҳои Мустақил рӯзҳои 16-17-уми ноябр ба шаҳри Бишкеки Қирғизистон сафар мекунад. Дар ин бора шаҳрдории Душанбе хабар медиҳад.
Ба навиштаи расонаҳои Қирғизистон 16-уми ноябр дар қароргоҳи давлатии “Ала-Арча” ҷаласаи Шӯрои Ассамблеяи Байнипарламентии ИДМ баргузор мегардад, ки дар он сарони ҳайатҳои парлумонӣ ширкат меварзанд. Дар ин ҷаласа масъалаҳои ҷории рӯзномаи маҷлис, ҷамъбасти чорабиниҳои соли 2023 ва мониторинги маъракаҳои интихоботӣ дар ИДМ баррасӣ мегарданд.
Ҳамон рӯз ҷаласаи комиссияҳои доимии Ассамблеяи Байнипарламентии ИДМ оид ба масъалаҳои сиёсӣ ва хамкории байналхалқӣ ва сиёсати иҷтимоӣ ва ҳуқуқи инсон барпо мегардад.
Зимни ҷаласаи Ассамблеяи байнипарлумонии ҷавонони ИДМ масъалаи калидӣ баррасии амнияти иттилоотӣ дар интернет хоҳад буд.
Рӯзи 17-уми ноябр дар қароргоҳи давлатии “Ала-Арча” ҷаласаи 56-уми пленарии Ассамблеяи байнипарлумонии ИДМ баргузор мешавад, ки дар он дар баробари вакилони порлумон намояндагони созмонҳои байналмилалӣ, олимону коршиносон ширкат мекунанд.
