Кумитаи ҳолатҳои фавқулодаи Тоҷикистон (КҲФ) аз баста шудани роҳи Душанбе – Чаноқ дар километри 119, дар минтақаи ноҳияи Айнӣ хабар додааст.
Ин ниҳод бо нашри хабарномае гуфтааст, ки рӯзи 23-юми ноябр дар километри 119 роҳи Душанбе – Чаноқ, ки дар минтақаи ноҳияи Айнӣ мегузарад, сангрезӣ ба амал омад ва ҳоло “дар қитъаи мазкур роҳ баста буда, корҳо барои бартараф кардани офтаи табиӣ идома дорад”.
Субҳи имрӯз, IRS, ширкате ки масъули ҷамъоварии маблағ ва нигоҳубини роҳи мазкур аст, хабар дод, ки дар натиҷаи лағжиши кӯҳ ҳаракати яксамтаи нақлиёт ба роҳ монда шуд.
Пас аз нашри хабари КҲФ аз маркази матбуотии ин ширкат ба “Азия-Плюс” гуфтанд, “роҳ боз аст ва танҳо дар ҳаракати нақлиёт маҳдудият ҷорӣ шудааст”.
Зимнан, КҲФ гуфтааст, ки дар роҳҳои автомобилгарди Душанбе – Хуҷанд, Душанбе – Лахш, Душанбе – Рашт, Душанбе – Сангвор, Душанбе – Дарвоз – Хоруғ хатари яхбандӣ дар субҳу шом ва сангрезӣ боқӣ мондааст.
Ин ниҳод аз аҳолӣ хостааст, ки аз сафар ва рафтан ба минтақаҳои тармафуро худдорӣ намуда, ҳушёру эҳтиёткор бошанд.
“Ба ронандагон тавсия дода мешавад, ки хангоми ба нақша гирифтани сафар аз вазъияти роҳҳо хабардор шуда, ҳангоми харакат дар минтақаҳои куҳӣ ва ё минтақаҳои хавфноки роҳҳо фосилаи муқарраршудаи байни нақлиётро қатъиян риоя кунанд”, – ҳушдор додааст КҲФ.
Ин ниҳод гуфтааст, ки дар ҳолати рух додани ҳолатҳои фавқулодда ба рақамҳои: 112 ё 93 880 28 19 занг зананд.
