Дар арафаи Наврӯз дар Душанбе ярмаркаи маҳсулоти хӯрокворӣ ташкил мегардад, ки нархи маҳсулот дар он нисбати бозорҳо арзонтар аст. Ярмарка 16-уми март оғоз гардида, то 20-уми март идома мекунад.
Дар ин бора аз шаҳрдории Душанбе ба “Азия-Плюс” хабар доданд.
Ба иттилои манбаъ, ярмаркаҳо дар даромадгоҳи бозорҳои “Меҳргон” ва “Саховат”-и пойтахт, дар назди бинои ҳукумати ноҳияи Сино (рӯбарӯи беморхонаи “Шифобахш”, маъруф ба “Қараболо”) ва даромадгоҳи боғи Куруши Кабир дар ноҳияи Шоҳмансур баргузор мешаванд.
Сокинони пойтахт метавонанд гӯшт, орд, равған, биринҷ, қанд, маҳсулоти донагӣ ва сабзавоту меваҷотро бо нархи нисбатан арзон харидорӣ кунанд. Аммо нархи маҳсулот мушаххасан гуфта намешавад, танҳо таъкид мегардад, ки он чанд рӯз қабл аз оғози ярмаркаҳо муайян карда мешавад.
Бояд гуфт, ки ярмаркаҳо бо қарори Рустами Эмомалӣ, раиси шаҳри Душанбе баргузор мегардад. Маъмулан чунин ярмаркаҳо пеш аз ҷашнҳо ташкил шуда, маҳсулоти хӯрокворӣ бо нархи арзонтар аз бозор ба фурӯш гузошта мешаванд.
