Дар шаҳри Душанбе насби суръатёб (радар)-ҳои худкор оғоз шудааст, ки 19 намуди қоидавайронкунӣ аз ҷониби ронандаҳоро ба навор гирифта, ба пойгоҳи ягона ирсол мекунад.
Тавре ки ба “Азия-Плюс” аз БДА дар шаҳри Душанбе хабар доданд, чунин таҷҳизот дар роҳҳои Душанбе ва гирду атрофи он беш аз 6 ҳазор адад насб мешавад.
Давоми чанд рӯзи охир дар шабакаҳои иҷтимоӣ рӯйхати чанд макони пойтахт ва гирду атрофи он нашру паҳн гардид, ки ба гуфтаи корбарон, дар онҳо суръатёби худкор насб мешавад ва қоидавайронкунии ронандагонро ба навор гирифта, дар як пойгоҳ ҷамъ меорад.
Ба гуфтаи манбаъи мо, ҳадафи насби таҷҳизот таъмини бехатарии ҳаракат дар ҷодаҳо, кам кардани кормандони БДА ва ҳамин тариқ коҳиши дахолати инсонӣ дар ҳаракати нақлиёт мебошад.
Дар зер номи кӯчаҳои шаҳри Душанбе зикр шудаанд, ки дар онҳо гузоштани суръатёбҳо дар назар аст:
Ёдрас мекунем, ки чанде пештар президенти ҷумҳурӣ Эмомалӣ Раҳмон фармонеро ба имзо расонид, ки дар асоси он 30 дарсади кормандони БДА ихтисор карда мешаванд. Дар гузашта президент фаъолияти БДА-ро интиқод карда, роҳбари онро иваз карда буд.
Як манбаъи дигар аз БДА гуфт, ҳудуди 10 адади он ба таҷҳизоти марказӣ пайваст буда, ба таври санҷишӣ фаъолият доранд.
Вай афзуд, ин таҷҳизот дар якҷоягӣ бо лоиҳаи “Шаҳри ҳушманд” амалӣ мешавад ва ин ба лоиҳаи “Шаҳри бехатар” рабте надорад. Дар ҷойҳое, ки дар доира “Шаҳри бехатар” дурбин насб нашудааст, суръатёб насб мешаванд.
Насби суръатёб дар ҳолест, ки дар шаҳри Душанбе ва Хоруғ лоиҳаи “Шаҳри бахатар” амал мекунад ва он дар роҳҳо қоидавайронкунии ронандагонро аксбардорӣ карда, дар як пойгоҳи муайян ҷамъоварӣ менамояд. Дар асоси акси қоидавайронкуниҳо ронандагон ҷарима мешаванд.
