Ба овозхони шинохтаи тоҷик Давлатманд Холов, ки чанд рӯз пеш дунёро тарк кард, ҷоизаи “Лавҳи тақдир”-и Эрон тақдим гардид. Ҷоизаро дар Теҳрон, зимни баргузории маросими “Шаби мусиқии суннатии Тоҷикистон” ба намояндагони санъату фарҳанги тоҷик эҳдо карданд.
Қарор буд ин ҷоиза ба Лоиқ Холов, писари Давлатманд Холов тақдим карда шавад, аммо бинобар азодорӣ, ӯ ҳам натавонистааст ба Теҳрон равад. Давлатманд Холов 18-уми феврал, дар синни 74-солагӣ, аз олам даргузашт.
Маросими “Шаби мусиқии суннатии Тоҷикистон” бо ҳамкории Сафорати Тоҷикистон дар Теҳрон, 22-юми феврали соли ҷорӣ дар Пажӯҳишгоҳи фарҳангии Эко, бо иштироки намояндагони Вазорати фарҳанги Тоҷикистон ва чеҳраҳои сиёсиву фарҳангии Эрон баргузор шудааст.
Ба гузориши хабаргузории “Ирон Пресс” маросими мазкур бо чанд дақиқа сукут барои гиромидошти хотираи Давлатманд Холов шурӯъ шуд.
ИЗОБРАЖЕНИЕ
Баъд аз суханрониҳои Низомиддин Зоҳидӣ, сафири Тоҷикистон дар Эрон ва Давлат Сафарзода, муовини вазири фарҳанги Тоҷикистон, навозандаю овозхонҳои машҳури тоҷик барои ҳозирон намунаҳое аз "Шашмақом" ва "Фалак"-ро пешкаш намуданд.
Дар идомаи ин маҳфил наворе аз ҳамкории ҳодравон Давлатманд Холов бо Шаҳроми Нозирӣ, хонандаи саршиноси эронӣ пахш гаридааст.
Дар ин барнома сафирони муқими Теҳрон, ҳунармандон ва шахсиятҳои фарҳангӣ, сафирони собиқи Эрон дар Тоҷикистон низ ҳузур доштанд.
Ҷоизаи “Лавҳи тақдир” ҳамчун нишон ифтихор ва қадрдонӣ аз заҳматҳо ба шахс ё созмоне эҳдо мешавад.
