Субҳи имрӯз, 7-уми март, дар бозори қисмҳои эҳтиётии нақлиёт – “Баҳор” дар шаҳри Бохтар сӯхтор сар зад. Дар пайи ин ҳодиса 7 мағоза зарар дидааст.
Аз Раёсати Хадамоти оташнишонии вилояти Хатлон ба “Азия-Плюс” хабар доданд, ки ба қисми навбатдорӣ соати 7:20 дақиқа доир ба сар задани сӯхтор хабар доданд.
“Сӯхтор бештар аз 200 метри мурабаъро фаро гирифта, 7 нуқтаи фурӯши қисмҳои эҳтиётии автомобил зарар дидаанд. Аммо сабаби сӯхтор то ҳол маълум нашудааст”, – гуфтанд аз ин раёсат.
Масъулини ин ниҳод гуфтанд, ба ҷойи ҳодиса 7 дастаи оташнишонӣ сафарбар шуда, тавонистанд аз паҳншавии он пешгирӣ кунанд.
“Наздики 2 000 метри мурабаъ ё беш аз 50 нуқтаи фурӯши қисмҳои эҳтиётии автомобил аз сӯхтор наҷот дода шуд”, – зикр карданд дар Раёсати Хадамоти оташнишонии вилояти Хатлон.
Айни замон сабаби сӯхтор ва зарари аз он расида аз ҷониби мақомоти дахлдор муайян карда мешавад.
