Давоми 6 моҳи аввали соли 2024 дар вилояти Суғд 12 ноболиғи то 17-сола ҳомила шуда, 6 нафари онҳо аллакай таваллуд кардаанд. Дар ин бора Раъно Рустамова, сармутахассиси Раёсати тандурустии вилояти Суғд ба “Азия-Плюс” хабар дод.
Ба иттилои ӯ, ноболиғони ҳомила дар шӯъбаи тиббӣ – машваратии ҷавонон, ки дар заминаи Маркази солимии репродуктивии вилоят ҷойгир аст, давраи ҳомилагиро мегузаронанд.
“Ҳамаи онҳо зери назоратанд. Ҳамчунин, аз ин ҳолат мақомоти ҳифзи ҳуқуқ огоҳ карда шудаанд”, – гуфт Раъно Рустамова.
Ӯ мегӯяд, ин “модарони ноболиғ” бо назардошти урфу одати миллӣ дар таваллудхонаи вилоятӣ ҷойгир шуда, онҷо таваллуд хоҳанд кард. Зеро, тибқи қонун ҳомилагии онҳо иҷозат набуда, метавонанд боиси хушунат нисбати ин ноболиғон шавад.
Бояд гуфт, ки дар Тоҷикистон духтарони то 18-сола бар асоси қонун ноболиғ дониста мешаванд ва ҳаққи шавҳар кардан ё ҳомидар шуданро надоранд. Дар сурати ошкор шудани ҳомилагии онҳо, омилони он муҷозот хоҳанд шуд.
Ҳамчунин, ҷомеаи суннатии тоҷик ҳам ҳомилагии ноболиғонро қабул надорад ва маҳкум мекунад.
