Дар маҷлиси ҳукумати Тоҷикистон рӯзи 29 август Барномаи миллии бехатарии авиатсияи граждании Тоҷикистон барои солҳои 2025-2030 қабул шуд.
Тавре ки хадамоти матбуоти сарвари давлат иттилоъ медиҳад, ҳадафи барномаи мазкур таъмини бехатарии мусофирон, ҳайати парвозӣ, кормандони рӯйзаминӣ, ҳифзи иншооту инфрасохтори фурудгоҳҳо ва самаранокии мунтазами парвозҳои байналмилалии авиатсияи гражданӣ мебошад.
Дар маҷлис таҳти раёсати президенти ҷумҳурӣ Эмомалӣ Раҳмон ҳамчунин Стратегияи пешгирӣ, назорати бемориҳои ғайрисироятӣ ва осеббардорӣ дар Тоҷикистон барои давраи то соли 2040 қабул шуд.
ИЗОБРАЖЕНИЕ Эмомалӣ Раҳмон
Вазири тандурустӣ ва ҳифзи иҷтимоии аҳолии ҷумҳурӣ Ҷамолиддн Абуллозода дар ин робита изҳор намуд, ки стратегия ҳадаф, вазифа ва афзалиятҳои ошкорсозии бармаҳали бемориҳо, паст кардани сатҳи беморшавӣ, коҳиш додани фавти бармаҳал ва маъюбият аз бемориҳои ғайрисироятӣ ва беҳтар намудани сифати ҳаётро муайян менамояд.
Самтҳои асосии татбиқи стратегия амалисозии чорабиниҳо, аз қабили тарғиби принсипҳои тарзи ҳаёти солим ва пешгирии бемориҳои ғайрисироятӣ дар байни аҳолӣ мебошад.
Эмомалӣ Раҳмон ба вазорату идораҳо, мақомоти маҳаллии ҳокимият ҷиҳати амалисозии стратегия, андешидани тадбирҳои зарурӣ ва пешниҳод кардани ҳисобот аз рафти иҷрои корҳо дастуру супоришҳо дод.
Гуфта мешавад, доир ба таъсиси Муассисаи давлатии “Маркази миллӣ оид ба амалинамоии Созишномаи Париж” ва дар бораи Тартиби таъин намудани кумакпулии унвонии иҷтимоӣ, муайян намудани андозаи он ва шаҳрвандони камбизоат дар Тоҷикистон қарорҳои дахлдор қабул карда шуд.
ИЗОБРАЖЕНИЕ
Дар фарҷоми маҷлис президент таваҷҷуҳи ахзои ҳукуматро ба зарурати омодагии ҷиддӣ ба оғози соли нави хониш ва мавсими зимистон ҷалб кард.
Ҳамчунин дар ҷараёни маҷлис лоиҳаҳои як қатор қонунҳо, аз ҷумла лоиҳаи Қонуни ҶТ “Дар бораи низоми ягонаи давлатии бақайдгирӣ ва баҳисобгирии ҳуқуқвайронкуниҳо”, “Дар бораи ворид намудани тағйирот ба Кодекси ҳуқуқвайронкунии маъмурии ҶТ” ва “Оид ба ворид намудани тағйиру иловаҳо ба Қонуни ҶТ “Дар бораи иҷораи молиявӣ (лизинг)” муҳокима ва барои баррасӣ ба Маҷлиси намояндагони Маҷлиси Олии Тоҷикистон ирсол карда шуд.
