Дар Русия даҳҳо муҳоҷир шикоят кардаанд, ки онҳоро иштибоҳан ба феҳристи шахсони таҳти назорат ё “рӯйхати сиёҳ” ворид кардаанд. Дар ин бора Валентина Чупик, ҳомии ҳуқуқи муҳоҷирон ба хабаргузории “Агентство” иттилоъ додааст.
Ба гуфтаи Чупик, аксари муҳоҷирон ҳангоми дарёфти паём аз бонкҳо дар бораи баста шудани ҳисоби бонкияшон, инчунин, ҳангоми боздошт (махсусан дар марз) ва ихроҷ аз кор фаҳмидаанд, ки дар ин рӯйхат номнавис шудаанд.
Чупик гуфтааст, дар ду рӯзи охире, ки феҳристи мазкур фаъол гардидааст, дастикам 31 муҳоҷир барои кумак ба ӯ муроҷиат кардаанд, ки 8 нафари онҳо шаҳрвандони Тоҷикистон будаанд.
Ӯ гуфтааст, ки бо ҳамаи ин афрод суҳбат кардааст ва дар аксари маворид, ҳеч далели қонуние барои сабти номи онҳо дар ин феҳрист пайдо нашудааст.
Гуфта мешавад, ки бештари ин афрод аз қарор доштани худ дар “рӯйхати сиёҳ” тавассути паёмҳои бонкҳо дар бораи масдуд шудани ҳисоби бонкияшон огоҳ шудаанд.
Валентина Чупик ба муҳоҷирон тавсия додааст, ки пулҳои худро аз бонкҳо гиранд.
“Бо сабабе, ки ҳар касро бидуни далел дар ин феҳрист қарор медиҳанд, ба ҳамаи муҳоҷирон тавсия медиҳам, ки фавран пулҳояшонро аз ҳисобҳои бонкӣ гирифта, ба хона фиристанд ва танҳо маблағи мавриди ниёзи худро нигоҳ доранд”,- таъкид кардааст ӯ.
Телеграм-канали Baza, наздик ба ниҳодҳои амниятии Русия низ аз ба таври густурда масдуд шудани ҳисобҳои бонкӣ пас аз фаъол шудани рӯйхати таҳти назорат хабар додааст. Ба иттилои ин манбаъ, садҳо шаҳрвандони хориҷӣ бо мушкили баста шудани кортҳои бонкиашон рӯбарӯ шудаанд.
Дар рӯйхат будан ё набудани худро метавонед осон ва сода тариқи Telegram-боти “Азия-Плюс” – apnamecheck_bot санҷед.
