Дар Хадамоти алоқаи Тоҷикистон Маркази нави тамос бо рақами "40-30" ба фаъолият оғоз кард, ки тариқи он шаҳрвандон метавонанд нисбат ба мушкилоте, ки доир ба хизматрасониҳои соҳаи алоқа ба миён меояд, муроҷиат намоянд.
Бино ба маълумоти Хадамот, маркази тамос ба таври шабонарӯзӣ ва сарфи назар аз рӯзҳои истироҳатӣ, арзу шикоятҳои марбут ба мушкилот бо операторон ва дигар масоили вобаста ба соҳаи телекоммуникатсияро қабул мекунад.
“Мақсад аз таъсиси Маркази тамос бо телефони боварии кӯтоҳ (40-30) баланд бурдани сатҳу сифати хизматрасониҳои алоқаи барқӣ дар кишвар, расидагӣ ба муроҷиатҳои шаҳрвандон ва бартараф кардани мушкилоту монеаҳои дар соҳа ҷойдошта бо механизми содаву дастрас барои шаҳрвандон, мебошад”, – омадааст дар хабар.
Гуфта мешавад, дар баробари соддаву дастрас будани механизми нави онлайнӣ ва интерактивӣ, Марказ баррасӣ ва бартараф намудани оҷилӣ ва дақиқи арзу шикоятҳоро таъмин менамояд.
Вале баъди нашри ин хабар дар шабкаҳои иҷтимоии "Азия-Плюс", бархе корбарон нигаронӣ карданд, ки тавассути ин рақам (40-30) ба зангҳои онҳо касе посух намедиҳад.
Ёдрас мекунем, ки моҳи январ Исфандиёри Саъдулло сардори нави Хадамоти алоқа таъин шуд. Ӯ дар ин мансаб Бег Сабурро , ки пас аз 10 соли кор дар ин вазифа ба нафақа рафт, иваз кард.
Замони роҳбарии Бег Сабур дар соҳаи алоқа мушкилоти зиёд, аз қабили сифати пасти интернет, арзиши баланди хидматрасониҳо ва яккаҳукмрон будан (монополия кардан) дар бозори телекоммуникатсионӣ ба миён омаданд.
Қобили зикр аст, ки Тоҷикистон муддати тӯлонӣ яке аз кишварҳо бо интернети гаронтарин дар Осиёи Марказӣ боқӣ монда, аз лиҳози суръати алоқа низ дар мавқеъҳои паст қарор дорад.
Акнун ба Исфандиёри Саъдулло лозим меяод, ки мушкилоти сифати интернет ва баланд будани нархи хидматрасониҳои алоқаро ҳаллу фасл намуда, инчунин бо масоили яккаҳукмрон будан дар соҳа муборза барад. Ҳаллу фасли ин масоил равиши комплексӣ ва ҷорисозии ислоҳотро тақозо мекунад.
Дар бораи мушкилоти соҳаи алоқаи ҷумҳурӣ дар маводи зерини мо маълумоти бештар муфассал қобили дарёфт аст: “Раиси нави Хадамоти алоқа сабаби суст будани интернетро гуфт ва ваъдаи арзон кардани нархи онро дод”
