Аюб Усмонзода, ректори Донишгоҳи давлатии Хуҷанд ба номи академик Бобоҷон Ғафуров бо гумони даст ба фасодкорӣ задан, боздошт шудааст. Далели боздошти ректор мақомот расман шарҳ надоданд, аммо се манбаъ ба “Азия-Плюс” тасдиқ карданд.
Як манбаи “Азия-Плюс” дар Донишгоҳи давлатии Хуҷанд (ДДХ) ва як манбаи дигар дар мақомоти тафтишоти вилояти Суғд тасдиқ карданд, ки Аюб Усмонзода 11-уми март аз сӯйи мақомоти амнияти вилоят боздошт гардид ва ҳоло бозпурсӣ мешавад.
Талошҳои мо барои дастрас кардани иттилоъ расмӣ аз мақомоти амнияти вилоят бесамар анҷомид.
Ба иттилои манобеи мо, ректори ДДХ барои фасодкорӣ гумонбар аст, аммо маълум нест, ки сухан мушаххас сари чанд пул ва дар кадом ҳолатҳо меравад.
Ҳамсари Аюб Усмонзода далели боздошти шавҳарашро тасдиқ кард, аммо нахост дар бораи тафсилоти он суҳбат кунад.
Ӯ, ки бидуни зикри номаш бо мо тариқи телефон суҳбат мекард, гуфт, “шавҳарам бегуноҳ аст ва ман бовар дорам, ки ҳақиқат ошкор мешавад”.
“Шавҳарам табиатан одами нек, боандеша аст ва мумкин нест, ки даст ба кори ғайре зада бошад”, – гуфт ӯ.
Ӯ гуфт, бо шавҳараш дар боздоштгоҳ мулоқот кардааст ва ҳолати ӯ хуб аст.
Яке аз се фарзандони Аюб Усмонзода ҳам зимни як суҳбати телефонӣ ба бегуноҳии падараш ишора кард, аммо нахост батафсил суҳбат кунад.
Аюб Усмонзода аз руйи ихтисос таърихшинос буда, унвонҳои илмии доктори илмҳои таърихро дорад. Ӯ аз апрели соли 2022 ректори ДДХ аст.
Рӯзи 18-уми март, вақте хабарнигори “Азия-Плюс” ба ДДХ рафт, касе аз кормандони раёсати донишгоҳ нахостанд ин мавзӯро расман шарҳ диҳанд.
Боздошти ректори ДДХ пас аз тахминан як моҳи эълони ошкор гардидани ҳолатҳои зиёди фасодкорӣ дар ин донишгоҳ сурат мегирад.
Моҳи гузашта дар нишасти хабарии худ сардори Раёсати Агентии зиддифасоди вилояти Суғд Донишгоҳи давлатии шаҳри Хуҷандро муассисаи фасодзада номида, гуфта буд, ки дастикам 49 мавриди ҷиноятҳои коррупсиониро дар Донишгоҳро ошкор карданд.
Салимзода гуфта буд, нисбат ба панҷ корманди донишгоҳи мазкур парвандаи ҷиноӣ боз карда шуда, барои тасдиқи фикри айбдоркунӣ ба мақомоти судӣ ирсол гардид. Аммо на дар нишасти матбуотии моҳи гузашта ва на баъди он номи ин 5 нафар кормандони донишгоҳро ошкор накарданд.
Моҳи майи соли 2023 низ милитсияи вилояти Суғд аз боздошти декан ва муовини декани факултети таърих ва ҳуқуқи Донишггоҳи давлатии Хуҷанд ба номи Бобоҷон Ғафуров бо иттиҳоми гирифтани пора гузоришии видеоӣ дода буд.
Дар нишастҳои матбуотӣ Ректори боздоштшудаи ДДХ ба номи академик Бобоҷон Ғафуров Аюб Усмонзода хабари боздошти кормандонашро бо вуҷуди расонаӣ шудан бепоя ва туҳмат мехонд.
