Александр Бастрикин, раиси Кумитаи тафтишоти Русия, ки бо андешаҳои тунди миллатгароёна ва зидди муҳоҷиронаш шинохта шудааст, дар ҳамоиши ҳуқуқшиносон дар шаҳри Санк-Петербург гуфт, ки муффаттишони ниҳоди зери роҳбарии ӯ ҳамроҳ бо кормандони ВКД ва Росгвардия дар рейдҳои “маҳалли таҷаммӯи муҳоҷирон” иштирок карда, онҳоеро, ки шаҳрвандии Русияро гирифта, худро ба қайди ҳарбӣ нагузоштаанд, мушаххас кардаанд.
Ӯ таъкид кард, ки зимни ин рейдҳо 80 ҳазор “чунин шаҳрвандони Русия” муайян ва дастгир шуда, 20 ҳазори онҳо аллакай ба ҷанги Русия дар Украина фиристода шудаанд.
“Шаҳрванди ҷавони Русия, ки бо чӣ сабабе зиндагӣ дар Ӯзбекистон, Тоҷикистон, Қирғизистонро хуш надоранд, дар ҷабҳа қарор доранд”, – зикр кард ӯ.
Инчунин, раҳбари Кумитаи тафтишот гуфт, ба Русия таҳти номи муҳоҷирон “ҷинояткорони оянда” сафар мекунанд ва онҳоро “қапида” ба ватанашон баргардонидан лозим аст, то ки “ҷиноятро он ҷо, на дар Русия содир кунанд”.
Сухан аз рейдҳое меравад, ки тайи чанд соли охир, махсусан дар пайи оғози ҷанги Русия дар Украина, дар ин кишвар бамаротиб бештар шуда, ба шеваи дағал, таҳқиромез ва бидуни риояи ҳуқуқҳои инсон гузаронида мешавад. Дар ҷараёни ин рейдҳо муҳоҷирон боздошт гардида, теъдоде аз онҳо ихроҷ мешавад ва қисме, онҳое, ки шаҳрвандии Русияро доранд, иҷборан дар қайди ҳарбӣ гузошта шуда, гурӯҳе ба ҷанг фиристода мешаванд. Мақомоти Русия ин амали худро “мубориза бо муҳоҷирати ғайриқонунӣ” менаманд.
Қишварҳои Осиёи Марказӣ, аз ҷумла Тоҷикистон, Қирғизистон ва Ӯзбекистон аз ин шеваи рафтори мақомоти Русия борҳо нигаронии худро иброз дошта, ҳатто расман эътирози худро баён карда буданд. Вале ин бадрафтории мақомоти Русияро тағйир надод.
