Дирӯз, 8-уми июн, Эмомалӣ Раҳмон, раисҷумҳури Тоҷикистон дар шаҳри Нитсаи Фаронса дар чорабинии Даҳсолаи байналмилалии амал оид ба илмҳои яхшиносӣ (2025-2034) ширкат ва суханронӣ карда, як қатор пешниҳодҳоро низ ба миён гузоштааст.
Раисҷумҳури Тоҷикистон аз вазъи ташвишовари тағйирёбии иқлим, таъсири он ба муҳити зист, обшавии бесобиқаи пиряхҳо ва норасоии оби тоза сухан карда, аз паёмадҳои харобиовари обшавии пиряхҳо ва таъсиру зарари он ба иқтисодиёт, экосистемаҳои кишварҳо ва ҳаёти одамон ёдовар шудааст.
Эмомалӣ Раҳмон таъкид кардааст, ки қариб 60 дарсади пиряхҳои Осиёи Марказӣ дар кӯҳҳои Тоҷикистон воқеъ аст.
Ба гуфтаи ӯ, тӯли 20 соли ташаббускориҳои Тоҷикистон дар соҳаи обу иқлим 14 қатъномаи Тоҷикистон дар ин самт аз ҷониби Созмони миллаи муттаҳид ҷонибдорӣ шудааст.
Эмомалӣ Раҳмон ҳамчунин аз коҳишёбии пиряхҳо нигаронӣ карда, таҳдиди онро ба мардуми сайёра таъкид намудааст. Ба гуфтаи ӯ, ин раванд то соли 2050 метавонад ба як миллиард аҳолии минтақаҳои наздисоҳилӣ ва ҷазиракишварҳо таъсир расонад.
Инчунин раисҷумҳури Тоҷикистон гуфтааст, тасмим гирифтаанд, ки бо мақсади омӯзиши таъсири тағйирёбии иқлим дар Душанбе Маркази ҳамоҳангсозии минтақавии яхшиносӣ таъсис дода шавад.
ИЗОБРАЖЕНИЕ Эмомалӣ Раҳмон бо Одри Орзуле, роҳбари ЮНЕСКО
Ӯ зимни суханронии худ ҳамчунин пиромуни таваҷҷуҳ ва натиҷаҳои ҳамоиши “Соли байналмилалии ҳифзи пиряхҳо”, ки аз 29 то 31-уми майи соли ҷорӣ дар Душанбе баргузор гардид, қаноатмандӣ изҳор кардааст.
Эмомалӣ Раҳмон дар поёни суханронии худ аз ҷомеаи ҷаҳон даъват намуд, ки ҳамкориро баҳри ҳифзи криосфера ва тақвияти илмҳои криосферӣ дар ҳама сатҳҳо густариш диҳанд.
Бояд гуфт, чорабинии Даҳсолаи байналмилалии амал барои илмҳои яхшиносӣ дар доираи Конфронси сеюми СММ оид ба уқёнус баргузор шудааст. Дар он роҳбарони 65 кишвари ҷаҳон, Антониу Гутерриш, Дабири кулли СММ ва роҳбарони як қатор созмонҳои байналмилалию минтақавӣ иштирок кардаанд.
Ёдрас мешавем, ки Эмомалӣ Раҳмон, раисҷумҳури Тоҷикистон дирӯз, 8-уми июн барои иштирок дар ин конфронс ба Фаронса сафар кард. Бояд гуфт, Даҳсолаи байналмилалии амал оид ба илмҳои яхшиносӣ (криосферӣ), солҳои 2025-2034 аз ҷониби СММ бо пешниҳоди якҷояи Тоҷикистон ва Фаронса қабул шудааст.
