Дар Фархор як зани 27-сола худ ва 4 фарзанди ноболиғашро ба дарёи Сурхоб партофтааст. Мақомот мегӯянд, сабаби ҳодиса моҷарои оилавӣ будааст.
Аз Раёсати Кумитаи ҳолатҳои фавқулода ва мудофиаи шаҳрвандӣ дар минтақаи Кӯлоб ба “Азия-Плюс” гуфтанд, ҳодиса шаби 29 ба 30-юми июн, байни соатҳои 00:00 ва 01:00 рух додааст.
Манбаъ, аз ин зан Мадина Ҳалимоваи 27-сола, сокини деҳаи Сафарови ҷамоати деҳоти Хутани ноҳияи Фархор ном бурда гуфт, “зан баъди он, ки аз зани дигар гирифтани шавҳараш огоҳ мешавад, бо мақсади қасд гирифтан, шабона худ ва кӯдаконашро ба дарё меандозад".
Аз чаҳор кӯдак, се тани онҳо духтар ва яке писар буда, калонии онҳо панҷсола ва аз ҳама хурдӣ ҳамагӣ чандмоҳа будаанд. Онҳо Латофат, Зайнаб, Ёсамин, ва Муҳаммад ном доштаанд.
Аз ин ниҳод гуфтанд, ин зан аввал ду кӯдак ва баъдан ду кӯдаки дигарро бо худ ба дарё партофтааст. Вале худаш каме поинтар аз об берун шуда, кӯдаконро об бурдааст.
Манбаъ гуфт, то ҳол ҷасади ду кӯдак пайдо гардида, ҷустуҷӯи ду кӯдаки дигар идома дорад.
Ҳоло ин зан дастгир шуда, барои одамкӯшӣ ё моддаи 104 нисбаташ парвандаи ҷиноятӣ боз шудааст.
Аз Вазорати корҳои дохилии кишвар низ ҳодисаро тасдиқ карданд, аммо тафсилоти бештар надоданд.
Бояд гуфт, ки рӯзи 30-юми июн дар шабакаҳои иҷтимоӣ аксу наворҳое паҳн гардид, ки гуфта мешуд, як зан 4 фарзанди худро ба дарё партофтааст. Дар наворҳо дида мешуд, ки масъулини мақомот аз дарё ҷасадҳоро ҷустуҷӯ доранд.
Ин бори аввал нест, ки чунин ҳодиса иттифоқ меафтад. Қаблан низ борҳо занон қасди куштори худ ва кӯдаконашонро карда буданд. Моҳи августи соли 2020 зани 30-солае дар ноҳияи Рашт бо се фарзандаш худро ба дарёи Сурхоб партофта буд.
