Дар нимсолаи аввали соли 2025 муяссар гардид, ки майдони заминҳои партофташуда ба андозаи 343 гектар коҳиш дода шавад. Қисми зиёди онҳо – 330 гектар заминҳои обёришаванда мебошанд.
Дар ҷаласаи ҳайати мушовара (коллегия)-и Кумитаи давлатии идораи замин ва геодезияи Тоҷикистон зикр гардид, ки ин майдон ба категорияи заминҳои корам гузаронида шудаанд.
Тавре ки дар Кумита зикр мекунанд, тадбирҳои андешида ба таҳкими амнияти озуқаворӣ ва рушди устувори қаламравҳо дар соҳаи кишоварзӣ мусоидат менамоянд. Тағйироти зикршуда дар қарори ҳукумати ҶТ аз 28 марти соли 2025 №224 «Дар бораи ҳисобот оид ба заминҳои мавҷудбуда, тақсимоти онҳо аз рӯи гурӯҳҳо, намудҳо ва заминистифодабарандагони ҷумҳурӣ” дарҷ ёфтааст.
Мувофиқи маълумоти омори расмӣ, то аввали соли ҷорӣ 18 ҳазору 701 гектар замин дар Тоҷикистон ба ҳисоби заминҳои партовташуда дохил мешаванд, ки 16 ҳазору 228 гектари онҳо қитъаҳои обёришаванда мебошанд. Ин нишондиҳанда зиёда аз 85% аз ҳаҷми умумиро ташкил медиҳад. Ин заминҳо комилан барои парвариши зироати кишоварзӣ коршояманд.
Дар ҷаласа зарурати тақвияти назорат аз болои истифодаи захираҳои замин, баланд бардоштани пайгирӣ (мониторинг)-и самаранокии фонди замин, инчунин ҷорисозии усулуҳои муосири истифодаи замин бо назардошти хавфу хатарҳои тағирёбии иқлим таъкид шуд. Ба масъалаи мутобиқати низоми истифодаи замин ба шароитҳои ҷории иқтисодӣ ва экологӣ таваҷҷуҳи хосса зоҳир шуд.
Аз рӯйи натиҷаи баррасиҳо ба раҳбарият ва воҳидҳои минтақавӣ ҷиҳати идомаи кори доимӣ оид ба ҷалби қитъаҳои истифоданашуда ба гардиши кишоварзӣ, таъмини назорати қатъӣ аз болои истифодаи оқилонаи замин, инчунин тақвияти ҳамкории мутақобила байни сохтору идораҳо барои ноил гардидан ба натиҷаҳои устувор дастуру супоришҳо дода шуд.
