Давоми моҳҳои январ-июли соли 2025 Русия ва Беларус содироти сӯзишвориро ба Тоҷикистон дар муқоиса бо ҳамин давраи соли гузашта зиёд карданд. Дар ин бора The Moscow Times бо истинод ба Reuters хабар медиҳад.
Дар муқоиса бо 494,6 ҳазор тоннаи соли гузашта ҳудуди 663,8 ҳазор тонна сӯзишворӣ ба ҷумҳурӣ ворид шудааст. Аз ҳама бештар афзоиши воридоти гази моеъ, ки беш аз 12 баробар – аз 6,4 ҳазор тонна то 85,4 ҳазор тонна зиёд шудааст, ба қайд гирифта шудааст. Ҳамчунин интиқоли сӯзишвории дизелӣ то 308,8 ҳазор тонна (афзоиш ба миқдори 28%), керосини авиатсионӣ – то 41,5 ҳазор тонна (32%) ва бензин – то 228 ҳазор тонна (6%) афзудааст.
Сарфи назар аз афзоиши боусръати воридот аз Русия ва Беларус, дар нимсолаи аввали соли 2025 воридоти гази моеъ ба Тоҷикистн ба сурати умум коҳиш ёфтааст. Бино ба маълумоти Хадамоти зиддиинҳисории ҷумҳурӣ, дар зарфи 6 моҳи аввали соли равон 176,9 ҳазор тонна гази моеъ ба Тоҷикистон оварда шудааст, ки 18,5 ҳазор тонна камтар нисбат ба ҳамин давраи соли 2024 аст.
Дар Хадамот инро ба зиёдшавии шумори электромобилҳо (мошинҳои барқӣ) рабт медиҳанд, ки талабот ба газро ба сифати сӯзишворӣ ба мошинҳо кам мекунад. Нархи миёнаи воридот қариб дар сатҳи соли гузашта – 685 доллар барои 1 тонна дар соли равон ва 681 доллар дар соли 2024 боқӣ мондаст. Зиёда аз нисфи воридот (53%) ба Русия ва ҳаҷми боқимонда – ба Қазоқистон рост меояд.
Мувофиқи пешгӯии нишондиҳандаҳои макроиқтисодии Тоҷикистон барои солҳои 2026-2028, афзоиши ҳаҷми воридоти гази моеъ идома меёбад. Дар соли 2026 воридоти 336 ҳазор тонна ба маблағи 222 млн доллар, соли 2027 – 348,8 ҳазор тонна (234 млн доллар)) ва соли 2028 – 362 ҳазор тонна ( 246 млн доллар) дар назар аст.
Аз лиҳози харидории бензин ва сӯзишвории дизелӣ Қирғизистон (мутаноисбан 344,9 ҳазор ва 396,3 ҳазор тонна) пешсаф буда, керосини авиатсионӣ бештар ба Қазоқистон (162,2 ҳазор тонна) ва Ӯзбекистон (167,4 ҳазор тонна) фиристода шудааст. Ҳаҷми бештари гази моеъро Афғонистон (300,3 ҳазор тонна) харидааст.
