Федератсияи футболи Тоҷикистон (ФФТ) эълон кард, ки ситоди мураббиҳои тимҳои миллӣ ва олимпии кишвар, аз ҷумла, Гела Шекиладзе, сармураббии дастаи мунтахаби Тоҷикистон ва Леван Хомерики, сармураббии тими миллии олимпии кишвар аз вазифа озод шудаанд.
Ин ниҳод имрӯз, 10-уми сентябр, гуфт, пас аз “баромади ғайриқаноатбахш”-и тими миллӣ дар мусобиқаи Ҷоми миллатҳои “CAFA-2025”, ки дастаи мо дар майдони худ натавонист аз гурӯҳ барояд, шартномаи ҳамкорӣ бо Гела Шекиладзеро пеш аз муҳлат қатъ кардааст.
Мусобиқаи Ҷоми миллатҳои “CAFA-2025” аз 28-уми август то 8-уми сентябр дар Тоҷикистон ва Ӯзбекистон баргузор шуд. Тими миллии бо шикаст аз Ҳиндустон, ғалаба бар Афғонистон ва мусовӣ дар баробари Эрон, 4 хол касб карда, аз гурӯҳ берун баромада натавонист.
Баъди ин бебарорӣ мухлисони футболи меҳан дар шабакаҳои иҷтимоӣ аз кори сармураббии даста, махсусан дар интихоби нодурусти ҳайат, сахт нигаронӣ ва интиқод карданд. Бархе аз мухлисон тақозо доштанд, ки мураббӣ иваз шавад, аммо коршиносон бар ин боваранд, ки ин мушкили печидаи футболи тоҷикро ҳал намекунад.
ИЗОБРАЖЕНИЕ Ситоди мураббиҳои тимҳои миллии Тоҷикистон
Ҳамчунин, ФФТ имрӯз эълон кард, ки тасмим гирифт, ки пас аз баромади бебарори мунтахаби олимпии Тоҷикистон (U-23) дар марҳилаи интихобии Ҷоми Осиё-2026, шартномаи ҳамкориро бо Леван Хомерики тамдид накунад. Бояд гуфт, тими миллии олимпии кишвар зери роҳбарии ин мутахасси ба Ҷоми Осиё-2026 роҳ ёфта натавонист.
Бозиҳои дастаи мо, ки дар гурӯҳи “К” ҷойгир буд, дар Душанбе сурат гирифт. Вале мизбонӣ марҳилаи интихобии ин гурӯҳ будан ҳам ба тими миллии то 23-солаҳои Тоҷикистон кумак накард, то ба Ҷоми Осиё-2026 роҳхат гиранд. Дар ин ҷо ҳам мухлисон аз кори мутахассиси дигари гурҷӣ Леван Хомерики интиқод карда, талаби барканорияшро доштанд.
Федератсияи футболи кишвар изҳор доштааст, ки дастаи мунтахаби Тоҷикистонро ба бозиҳои боқимондаи марҳилаи интихобии Ҷоми Осиё-2027 ҳайати нави мураббиён омода мекунад, ки роҳбарияти ФФТ дар ояндаи наздик онро тасдиқ хоҳад кард.
